Minister hian zingah E.Lungdar BDO Office tualah SPMRM Rurban atanga lei tui dahkhawlna (Individual Water Storage Tank, 2000 Ltrs.) chu a dawng tu tur chhungkaw 80, Sailulak, Leng, Bawktlang, Mualcheng, E. Lungdar, Chekawn, Lung- chhuan, Khawlailung leh Sialsir khua atanga thlanchhuahte a hlan a. Minister chuan Rurban hmalakna kalpuina tura thlan zingah E. Lungdar Block a tel chu a lawmpui thu sawiin he hmalakna zar hi mipui ten an chhawr nasa hle niin a sawi a. "Ramin hma a sawna mihring kan changkang ang zelin kan tui mamawh a pung ve zel thin a. Chumi hre reng chung chuan Rurban atangin chhungkaw 80 ten tui dahkhawlna kan dawng a, tun tum hi kan sem hmasak ber a ni," a ti.

Hemi zawh hian Minister hian Leng khua panin khaw daiah Leng Sial Vulhtu Society ten an lo hmuaka, Minister hian an Sial te en sakin an mamawhte a ngaihthlak sak a, Society hian Minister hi Sial puitling lo pein an enkawl sak zui dawn a ni. Hemi zawh hian Leng Turmeric Processing Unit Rurban atanga din thar hawngin an hmunhma te a en sak bawk.

Aieng sawngbawlna a hawn zawh hian Saihnuna Hall ah Rurban Convergence hmanga kalpui tur Smart Village Project hawnna inkhawmah khuallian niin Leng Smart Project hawnna a nei leh a. Tun hnaiah Leng khuain tuihna humhalh kawnga Northeast zone a lawmman an la chu chhuanawm a tih thu a sawia, faina kawnga Leng hmalakna te, a mawina te, mipuite lungrualna te chu midangte tan entawn tlak nia a hriat thu sawiin midangte tihhmuhtu nih zel tum turin a chah a. Hmasawnna leh changkanna tam tak chu rilru put hmang dik atanga intan a nih thu sawiin engkim sawrkar atanga beisei vek lova a theih chin china sawrkar thawhpuia tanpuitu nih tum zel zawk turin a chah a ni.

Lengah hun a hman zawh hian Minister hian E. Lungdar a pan leh a, Rural Development Department kal tlanga NLCPR fund Rs. 434.96 lakh senga sak E. Lungdar Mini Sports Complex a hawng leh a ni.