ZALEN February 25, 2025 : Lengpui Airport Forum ten Lengpui Airport awmzel dan tur chungchangah political level-a India sawrkar dawr tul an tih thu booklet "Indian Air Force (IAF) hnena Lengpui Airport hlan hi a him lo" tih tlangzarhtu PC Lawmkunga, IAS (Rtd.) chuan Mizoram sawrkarin AAI an dawr dan chu nep deuha a hriat thu a sawi.

PC Lawmkunga, IAS (Rtd) chuan Mizoram sawrkarin IAF kuta hlan a tum chungchangah hian Airports Authority of India (AAI) kuta a beisei awm loh vang nia sawi a nih laiin a zu dawr dan erawh chu a nep deuh nia a hriat thu a sawi. AAI kuta hlan a beiseiawm loh nia sawi chungchangah service atanga a lo hmelhriat Civil Aviation Ministry Secretary V. Manga a zu biak thu a sawi a, ani chuan an lo ralkhat hriat thu a sawi a, sawrkar atangin rawtna chu awm se ngaihtuah chi nia a hriat thu leh a kaihhnawih ministry te nen pawh sawiho a ngaihtuah theih a nih thuin a lo chhang tih a sawi.

PC Lawmkunga chuan AAI dawr chungchangah an dai thuk lo a, thuneitute a la pawh lo nia a ngaih thu a sawi bawk. A sawi zelnaah, pawisa neih loh avanga IAF kuta hlan tum hi a dikna chin pawh a awm mai thei, mahse, pawisa neih dan kawng an dap em tih chu zawhna awm thei a nih thu a sawi. Finance Commission member a lo biak pawhin Mizoram sawrkarin memorandum siam chu ni se ngaihtuah theih tur a ngaih thuin a lo chhang niin a sawi bawk.