Aizawl: ICAR Mizoram Centre, Kolasib chuan Zirtawpni khan Tribal Sub Plan hnuaiah Farmers’ Interest Group 4 leh mimal 2 hnenah a thlawnin power tiller, tui pump leh pipe an sem a, Kolasib DC Dr H. Lalthlangliana chu a semna inkhawmah hian khuallian a ni.

DC chuan thu sawiin Mizoram chu sik leh sa bakah ruahtui thatna a nih thu sawiin, “Ram kan vat chhe reng chungin reilo te ah ngaw kan nei leh vat zel a. Mizoram-ah khawlum lutuk kan nei lova, hetiang rama awm chung hian kan rethei reng nih chuan mawhphurhna hlen loh kan nei tihna a ni,” tiin taimakna nen lo chuan khawiah mah hlawhtlinna a awm lo a, tunlai thiamna nena hman a nih chuan hlawhchhamna a awm lo tih a sawi bawk.

CAR Jt. Director Dr. I Shakuntala pawhin GKMS hnuaiah kut hnathawk Mizoramah 28,971 an awm a, Thawhtanni leh Ningani-ah crop weather bulletin tichhuah a nih thu leh thlai, ran vulh leh sangha khawina kawngah zirna an kalpui thin thu a sawi. ICAR hian FIG 4 leh mi mal 2 hnenah a thlawnin power tiller 3, tui pump khawl 10 leh pipe 6 semin field demonstration neih nghal a ni bawk.