ZALEN June 5, 2024; Vawiin June ni 5 hi World Environment Day a ni a, The Institution of Engineers (India), Mizoram State Centre huaihawtin he ni hi PWD, E-in-C Conference hall-ah hman a ni.

He ni hmanna inkhawm a khuallian Er. Lalrinkima Hnamte, Engineer in Chief, PWD chuan, "Hmasawnna hnathawh kal zelin khawvel sik leh sa nasa takin a nghawng a. Mizoram ngeiah pawh hmasawnna hnathawh avangin harsatna leh chhiatnate a thleng thin a. Chuvangin kan environment tichhe tam lo zawnga hmalakna kalpui a pawimawh hle a ni," a ti.

Dr. Lalsangzela Sailo, Asst. Professor, Dept. of Civil Engineer, Mizoram University chuan, "Sik leh sa inthlak inthlak vangin khawlum nasa mai nilo kawng hrang hrangin harsatna thleng a tam a. Mizoram ngeiah pawh vawi leh khata ruahpui sur vakte a thleng a, ruahtui tlak dan pawh a danglam nasa hle a. Mizorama kuthnathawktute pawhin an tuar mek a ni," a ti.

Khawvela sik leh sa danglam zelin harsatna a thlen nasat avangin United Nations chuan kum 1973 atang khan kumtin June ni 5 hi 'World Environment Day ' atan a puang a. Kumin he ni thupui atan 'Land Restoration, Desertification and Drought Resilience' tih a thlang a ni.