Aizawl: Indian Medical Association, Mizoram chuan Covid 19 do kawngah damdawi lam thawktu te dinhmun hrethiam a, tawngtai sak fo turin mipui te an ngen.

Nimina thuchhuah an siamah IMA Mizoram Branch chuan Covid-19 avangin thla ruk dawn lai Mizoram ah nunphung a buai tih sawiin hri danglam tak anih avang leh a hnathawh dan in ang lo tak avangin inven kawngah leh a veite enkawl kawngah tih dan tha ber pawh hriatthiam a har hle niin an sawi a.

Covid 19 hri vei mekte enkawl kawnga hmalatu, Frontline Workers, a bikin medical lama thawk, Hospital, CCC leh Sample Collection Team a thawktute chu hrileng laka derthawng ber ber te an ni tih sawiin India ramah pawh he hrileng enkawltu medical doctor 200 chuang laiin an thih phah bakah Mizo medical doctor zingah pawh 5 laiin he hri hi kai tawhin, pakhat phei chuan a thihpui hial tawh a ni, an ti a.

Vanduaithlak takin an member pakhat, ZMC a Covid-19 enkawlnaa thawk lai mek chuan July ni 20 khan hri lo kai vein a test result nghah lai mekin a thiante nen an lo in khelh avangin mi engemaw zatin harsatna an tawh phah a, pawi an ti hle tih an sawi a. "IMA chuan kan member thil tihsual palh hi pawi a ti em em a, a eizawnna leh a hmalam hun zel ngaihtuah chunga ngaidamturin mipuite kan ngen a. Mipuite pawhin frontline a thawkte dinhmun derthawnzia hi min hriatpui tih kan hria a, min tawngtai sak reng turin kan ngen nawn leh a ni e," tiin tarlan a ni.