Aizawl: P&E Minister leh bialtu MLA ni bawk R.Lalzirliana chuan nimin khan Rulchawm khaw chhunga leiminin chenna in a tihchhiatte a hmunah kalin a endik a. Leimin avanga in leh lo chan chhungkaw 7 hnenah tanpuina, tangka fai Rs. 20,000 theuh a hlan nghal a ni.

Rulchawm Village Council House a vantlang inkhawmna tawi buatsaih -ah P&E Minister R.Lalzirliana chuan leimin avanga in leh lo chan te chu thinlung takin a tawrhpui thu a sawi a, a tul angin sawrkarin hma a la chhunzawm dawn a ni, a ti. Minister chuan he vanduaina karah Mizo nunmawi - tlawmngaihna leh induhsak tawnna a lo lang erawh hmuhnawm a tih thu sawiin Rulchawm khaw mite chhiat tawhnaah hian Zonunmawi chu Mizo khawtlang nunah la vawn nun reng a nih zia a takin a hmuh theih a. Tanpui ngaite tanpuia chhawmdawl ngaite kan in tanpui thin hian Mizo nih a ti nuam thin a ni a ti. Tun dinhmunah leimin chhan chiang faka sawi theih la ni lo mah se, enfiah thuai a nih tur thu a sawi a. Helai leimin dan leh a nghawng theih te chu chiang zawka la zirchian a nih tur thu te leh hmalak zel dan tur pawh sawrkarin mi thiamte rawn tirin ruahmanna a siam dawn a ni, a ti.

Dt 02.10.2020 zing dar 7:30 bawr vel khan Rulchawm Field chhak leimin hian chenna in pathum Hrangbawiha, F. Kapliana leh Thazeli te in a hnawl chhe nghal a. Vengchhung inkalpawhna kawngpui pawh mihring kalna tur pawh zuah lovin a tih bal nghal bakah a bul hnaia chenna in 4 dang luah ngam lohin a siam nghal a ni. Heng in 4 te hi nimin khan Rulchawm, Ruallung, Mualpheng, Keifang, Lenchim leh Saitual khua atanga mitlawmngai ten hnatlangin an thiat nghal a. Inkalpawhna kawngpui bal hi siamthat a nih leh theih nan Minister R.Lalzirliana chuan PWD hotute a be nghal a. Minister hian leimin tihchhiat kawngpui siam that hmaa inkal-pawhna a awm theih nan pumpelh kawng siamna turin nuai 5 a ruahman nghal bawk a. A tul anga hman atan Silpauline 16 Rulchawm VC te hnenah hian a hlan nghal bawk a ni.

P&E Minister R.Lalzirliana chuan nimin tlai vek khan Saitualah a bial chhunga khaw 14 a chhit turin Solar Street Light 363 a sem chhuak nghal.