Mizo film hit em em mai 'Driver Kima' kha kan en tawh theuhin a rinawm - kha film siamtu In-House Production te ngei mai khan film thar an siam leh dawn e. Rapper G'Nie leh model Kimkimi te an inlan dawn a, boruak an nei nghal hat mai. 

Tlau Entertainment ten nikuma an sem Mizo Film Award-a Best Actor atana thlan Papuia leh Miss Mizoram finalist Esther Sailo te channa 'Driver Kima' kha In-House te kutchhuak film puitling pahnih zinga pakhat a ni a, beisei phak bakin a hit ti ila kan sawi sual awm lo e. An director Drew Pachuau kut them thiam zia hmuh theihin a awm a, film thar a buaipui leh pawh hi a mak hran lo. 

'Driver Kima' film hit chhan kha a changtute vang a tih loh theih loh bawk a, tun tuma an film thar turah pawh hian a changtu lam an hrawl leh viau dawn. G'nie boruak len zia sawi nawn a ngai lo - Kimkimi lah Mizo model zingah chuan 'chuai thei lo' an tih zinga mi kha a ni - en a chakawm tawh viau mai. An film thar tur hi eng lam hawi nge a nih dawn a la hriat loh a, a hriat theih thuai turah ngai ang.