Aizawl May 12, 2024 : Zirchianna atanga a lan danin, Mizoram chu India rama heroin hmang nasa ber state a ni a. Hetihlai hian kum 1984 atanga kumin May 10 thlengin ruihhlo vangin mi 1,842 an thi tawh.

Kum 2019 khan Ministry of Social Justice & Empowerment chuan India ram state leh UT zawng zawngah survey a nei a, chutah chuan Mizoram chu mi cheng zat atanga chhuta heroin hmang nasa ber niin, a pum puiah pakhatna a ni.

Hemi bakah hian March, 2024-a India Today-in an zirchiannna an tihchhuahah India ramah Mizoram chu meizial zu nasa ber state a ni bawk.

Excise & Narcotics department (END) chhinchhiah danin kumin chhungin May 10 thleng khan Mizoramah ruihhlo vangin mi 32 an thi a, heroin vanga thi tam berin, kum 22-50 inkar mi vek an ni.

Kum 1984 atanga May 10, 2024 thlengin ruihhlo vangin mi 1,842 an thi tawh a, mipa 1,616 leh hmeichhia 226 an ni.

END chhinchhiah danin kum 1984 khan ruihhlo vanga thi Mizoramah mi pakhat a awm a, ruihhlo vanga thi tam ber kum 2004-ah mi 143 an thi a, kum 2000-ah mi 139, kum 2001-ah mi 101 leh kum 2003-ah mi 136 an thi a, heng kumte hi ruihhlo thihpui awm tam kumte an ni.