Irish band lar Westlife te chu India ramah an lo kal dawn a, khawpui pathumah concert an nei dawn. 

Westlife hian ‘The Wild Dreams’ tour an nei mek a, ram hrang hrang an tlawh tur zingah India pawh a tel a ni. India rama khawpui lian pathum - Mumbai, Bengaluru leh Delhi-ahte an concert dawn - sum nei deuh tan chuan ticket book hma a fuh ang. 

India an lo kal hun tur hi November a ni a, BookMyShow Live ten an lo buaipui dawn a ni. November 24 khian Mumbai-ah concert an nei ang a, hemi hnu hian November 25 (Bengaluru) leh November 26 (Delhi) ahte concert an chhunzawm ang. 

An hla hit ber ber - Swear It Again, If I Let You Go, Uptown Girl, Hello My Love leh an special-edition studio album ‘Wild Dreams’a an hla hit te an perform dawn a ni. Westlife chuan, "India hian kan thinlungah hmun pawimawh tak a chang thin a, tour kan nei thei tur pawh hi kan phur tawh tak zet," tiin, India an lo kal tur chungchang phur takin an sawi. 

‘The Wild Dreams’ tour hi nikum atang khan UK-ah an tan tawh a, London-a stadium hmingthang Wembley Stadium-ah pawh concert chhimtu mipui an khat vek a ni. UK bakah hian Europe, North America te an hrut a, China leh Middle East te an pan leh dawn a, South Africa atangin India-ah an rawn lut dawn a ni. 

Westlife hi kum 25 kal ta khan - Nicky Byrne, Kian Egan, Shane Filan leh Mark Feehily ten an din a, khawvela band lar leh hlawhtling ber zinga mi an ni. India rama an tour ticket hi BookMyShow chuan September 17, 4 PM atangin an hralh chhuak ang.