ZALEN June 30, 2025 : June 30, 1986-a India leh Mizo National Front te Inremna ni champha lawmna chu vawiin khan MNF chuan Zoram hmun hrang hrangah an hmang. MNF President Zoramthanga chuan Saitual District huamchhunga hmanna Saitual-ah a hmanpui a, he remna hi india leh MNF inremna ni lovin Mizoram sawrkar leh India sawrkar inremna a nih thu a sawi.

He hmuna thu a sawinaah Zoramthanga chuan, "Kum 1986 June, ni 1 a in remna kha thenkhatten 'India leh MNF inremna alawm' tiin an sawi mahse a ni lo, Mizoram leh India ram inremna a ni a, indona a tel ve lo te aiawhin Pu Lalkhama'n a sign a, MNF zawng zawng aiawhin Pu Denga'n, a sign a, Indian aiawhin an sign bawk. India aiawhin MNF aiawhin Mizo mipui aiawhin he remna hi sign a ni," a ti.

MNF President chuan, "India leh keini ramhnuai sawrkar chhiat vanglai khan inremna siam ta ila, kan tlupherh rang khawp ang. Mahse, kan chak vanglai tak ve ve inremna kan sign a, constitution pawh tidanglam thei khawpin India pawh a chak a. Keini ramhnuai sawrkar pawh Economic leh thildangah pawh kan chak vanglai tak a ni a, sawrkar chak lo tan Inremna kha sign ngawt chi a ni lo, khatilai taka kha Remruattu Maka chuan min nghahtir char char a lo ni a, Remna kan siam ta a ni," a ti. 

Mizoram UT chu State-ah hlankai a ni a, Article 371G pawh special provision a ni nghal bawk a. He article 371G hian Mizo hnam dan, thubuai hla buaiah India Dan in a tihbuai ve theih loh a nih thu a sawi bawk.

Zoramthanga chuan, "Ram neitu nihna leh a behbawmah India parliament in thuneihna an nei lo, Mizoram mipui chiahin kan nei thei. He special protection hi India ramah Nagaland nen chiah kan nei a, amaherawh Nagaland chu kum 1962-ah khawngaih leh duhsak vanga a pek a an pek a ni a, chhuhsak se la a zo der. Keini chu India article 371G hi a lei a kan lei thlap a ni a, chhuhsak ngawt theih kan ni lo. Min laksak dawn chuan kan pek tawh, silai chi hrang hrang leh kan thisen man te kha min pek let ve leh a ngai a. He inremna (Peace Accord) hi Zoram mipui zawng zawngin kum 20 chhung kan tawrhna avanga min pek a ni. Min chhuhsak ve ngawt thei lo," a ti bawk.