Eptu tanrualna pawl thar, INDIA chu August 31 leh September 1 hian Maharashtra khawpui, Mumbai-ah an thukhawm leh dawn nia sawi a ni.

An thutkhawm leh turah hian Bengaluru-a an tih angin a ni khatnaah hruaitu lawk chin an ti phawt ang a, a tukah a huho deuhva thil sawiho an tum.

“Eptute hi ni hnih an thukhawm ang a, August 31 leh September 1-a tih turin hruaitute pawhin an pawm tawh,” tiin sawi a ni.

Pawai-a khualbukah thutkhawm hi neih tum a ni a, a ni khatna tlaiah chanchinbumite pawh an kawm nghal ang.

Tuna an tum aia hmaa thukhawm tur hian a ni rawt nual a ni a, hruaitu thenkhat hman thei remchang lo an awm a, tun hi an remchan tlan hun a ni.

Eptute thukhawm vawi thumna tur hi Maharashtra-a party pathum tangrual, Maha Vikas Aghadi-a tel, Shiv Sena (UBT) leh Sharad Pawar-a kaihhruai NCP ten Congress thlawpna nen an thleng a ni.

Tangrual pawl hian kum 2024 inthlanpui lo awm tura hma latu tur committee hrang hrang bakah an campaign dan turte pawh an sawi rin a ni.

An thawhhona a that theih nan joint secretariat pawh dina puan thuai a ni dawn nia sawi a ni.

Hei bakah hian party thenkhat hi state malah chuan inepte an ni a, ram pum huapa tanhova an inmil lohnate chin fel dan an dap bawk ang.

INDIA hi a vawi khat nan June khan Patna-ah thukhawmin thla hmasaah Bengaluru-ah an thukhawm leh a, tun hi a vawi thumna tur a ni.

Bengaluru-ah Congress President Mallikarjun Kharge-a’n party 26 aiawhten darkar li dawn an sawiho hnuah an hming, Indian National Developmental Inclusive Alliance (INDIA) a puang.