India coach thar Marquez-a’n a thawhpui atan a hmelhriat tha sa a thlang
![](https://zalen.s3.ap-south-1.amazonaws.com/images/news/1721644009_BB1qnZrA.jpg)
India coach thar, Manolo Marquez chuan a coaching staff tur a thlang tan ta a, a thachhangdawltu atana a hman tur pakhat, Mahesh Gawli tih loh chu a ngamtlak leh a lo kawp sate an ni deuh vek.
Kum 55 mi, Spanish manager hi All India Football Federation (AIFF) chuan Marquez-a hi Inrinni khan Igor Stimac aiawha national team enkawl turin diltu 291 zing atangin a thlang chhuak a, a coaching staff turte thlang fel turin an ti.
Marguez-a hian season tawp thlengin FC Goa a la enkawl zui dawn a, Benito Montalvo chu a assistant atan leh Jose Carlos Barroso chu strength & conditioning coach atan a hmang dawn a, anni pahnih hi Goa-a a thawhpui lai ve ve an ni.
Argentinean footballer hlui, Montalvo hi Barcelona-ah coach ni turin a inzir a, RCD Espanyol Academy Helsinki-ah head coach a lo ni tawh thin a. Marquez-a nen hian Covid-19 len hun lai khan Finland leh Sweden-a training camp atangin an inhmelhriat tan a. Spanish coach-in kum 2020-a Hyderabad FC a enkawl tan khan a zui ve nghal a ni.
Barroso-a hi Jamshedpur-a Cesar Ferrando-a coaching staff-a tel thin niin India-a tawnhriat tam tam lo nei tawh a ni.
Marquez-a coaching staff thar zinga Goa pawn lam mi awm chhun chu goalkeeper’s coach Marc Gamon chauh a ni dawn a. Ani pawh hi pawm lam mi ni rih mah se Spaniard nen Hyderabad FC-ah kum hnih lo inzui tawhin Belgium-ah a kalsan zui ta zawk a ni.
Marquez-a hian national team-a a hna tak tak hi September-ah a tan dawn a, a hna hmasa ber hi club lama Bhausaheb Bandodkar Memorial Trophy khelh hun lai a ni dawn.
“AIFF hian September thlaa a khelhpui turte a tifel thuai dawn a, thil chiang sa erawh Africa leh Oceania ram an ni ang tih a ni,” tiin AIFF hotu pakhat chuan a sawi a. “Tihfel har a nih avang hian (Fifa ranking) top 100-a mi chu an ni thei dawn lo va, India aia hniam an ni dawn a ni,” a ti bawk.
AIFF hian Hyderabad-ah inkhel hi a thleng dawn nia hriat a ni bawk.
October-a ram leh ram inkhelh hunah erawh India hian Vietnam tlawhin a thlengtu bakah Lebanon a hmachhawn dawn a. Fifa ranking thar berah chuan Vietnam (116) leh Lebanon (117) hi India (124) aia sang a ni.
“Manolo hian club leh ram enkawl hna a kawp dawn a; mahse, a inpeih tawh a. A khelhpui hmasak tur hi Indian Super League (ISL) inbuatsaihna a kal tan tawh dawn avangin hun a chep deuh dawn a, chu chona erawh hmachhawn turin a inpeih a ni,” tiin AIFF hotu hian a sawi.
Tawnhriat ngah tawh tak Spanish coach hian level hrang hrang - grassroots, youth, third division, second division leh kum 2017 khan LaLiga-ah Las Palmas thlengin a kaihruai tawh a. Kum 20 chuang mi a kaihhruai tawhah tun hi ram a enkawl hmasak ber tur a ni thung.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024