All India Football Federation (AIFF) Executive Committee thukhawm chuan India national team enkawltu turin FC Goa enkawl mektu, Manolo Marquez chu a tifel ta a. Amah pawh a phur a, fan-te lawmna thlen ngei a tum tih a sawi.

AIFF committee sang hi Inrinni khan President Kalyan Chaubey-a kaihhruain Football House, New Delhi-ah an thukhawm.

Senior Men’s National Team enkawltu tur atana dilna 291 zet an dawn atanga an thlan chhuah tak, Marquez hian tun season lo awm tur, 2024-25 hi a club enkawl lai a la enkawl zui dawn a, India team nen a kawp dawn rih tihna a ni.

AIFF President Chaubey chuan, “Hna pawimawh tak thawk turin Marquez-a kan lo lawm a, FC Goa chungah pawh ram tana thawk thei tura phalna an pek avangin kan lawm,” a ti.

“Marquez-a ho hian hmabak eng kan thlirho dawn a. AIFF, FC Goa leh amah inkarah hna pahnihah hian intihbuai tawn lova result tha a chhuah kan beisei,” a ti bawk.

Marquez-a pawhin a hna thar tur chungchangah hian, “Ka ram pahnihnaa ka chhal, India national team ka coach ka ni thei tur hi ka lawm a. India leh a mipuite nen hian ka lo kal hmasak ber atangin inpawhna tak kan nei nghal a. Fan maktaduai tel kan neihte hnena hlawhtlinna thlen ka châk a ni,” a ti.

“FC Goa pawh inhawng taka awma club head coach ni reng chunga national team-a kal min phalsak hi ka lawm a. AIFF-in hun remchang min siamsak hi ka lawm a, football tan thil ropui tak tih ka inbeisei,” a ti.

Kum 55 mi, Marquez-a hi Indian football-a tawnhriat ngah tawh niin national team-a player tam tak, a bikin naupang lam deuhte pawh a hrual chhuah an tam a. Tun hnaiah phei chuan national team-ah hian Hyderabad FC a enkawl laia a kaihhruaite an tel tam hle.

Kum 2020 atang khan Marquez hian India-ah hna a thawk tan a. Indian Super League (ISL) club pahnih – Hyderabad FC (2020-23) leh FC Goa (2023 atangin) a enkawl tawh a. Hyderabad FC hi 2021-22 khan ISL Cup a lakpui nghe nghe.

Europe-ah pawh hnuhma nei tawh niin an ram, Spain-ah Las Palmas chu La Liga-ah kaihruai tawhin Las Palmas B, Espanyol B, Badalona, Prat, Europa (third division) a enkawl tawh bawk.

India hian thla hmasaa Igor Stimac an bân hnuah coach thar zawngin diltu pawh an tam hle a. Heng zing atang hian an dawr kual hnuah an duh an thlang ta a ni.

Inrinnia AIFF committee-ah hian Mizoram atangin Lalnghinglova Hmar chu member a nih angin online-in a tel ve a ni.