Aizawl September 1, 2022 : Agriculture Minister C.Lalrinsanga chuan tukin khan Tuichangral Organic FPC Ltd thar Lakhuihthei metric tonnes 15.7  chu Haryana leh a chhevel a hralh turin Ch.Saprawnga Truck Terminal, Rangvamual atangin a vai liam. 

Agriculture Minister C.Lalrinsanga chuan, "Kan thlai thar te man man zawka hralhna kawng a inhawn belh zel a. Kuthnathawktute tana phurawm hle tih a sawi. India ramah heng kan thei leh thlai thar te hi duhtu an tam a, min dawrtu tur awm leh awm loh thuah harsatna a awm lo a ni," a ti.

C. Lalrinsanga chuan, "Sialhawk lakhuihthei chu Deputy Chief Minister Tawnluia chuan ram pawna hralh turin a lo vailiam tawh a. Tunah ram chhungah Organic Lakhuihthei hralh tura kan thawn chhuak leh ta hi Mizoramin bung thar a kai chhunzawm zel tih a chiang a. Sawrkar ang leh kuthnathawktu tan pawh a phurawm hle a ni. India chu khawvela consumer market lian ber zing a mi anih avangin Mizoram economy hampuarna khawp sum chang thei thlai leh thei hralhna turah harsatna a awm dawn lo,' a ti bawk. 

Tuichangral Organic FPC Ltd hi Mission Organic Mizoram, Agriculture department hnuaia din a ni a. Khawzawl district a khaw 8 - Khawhai,Sialhawk, Tlangmawi, Tlangpui, Chalrang, New Chalrang, Vangtlang leh Lungtan atangin lakhuihthei ching mi 500 in telkhawm a din a ni.