ZALEN March 9, 2025 : India hmarchhak state hrang hrang zingah Mizoram chu za zela chhutin telephone hmang nasa ber a ni a, za zelah 113.29 a tling.

Economic Survey 2024-2025-a tar lan a nih danin telephone/mobile phone hmang tam dan tehna, teledensity-a Mizoram dinhmun chu thingtlang (rural)-ah za zela 94.19 niin khawpui (urban)-ah za zela 128.83 a tling.

Za zela chhutin BTS (Base Transceiver Station) fiber connection punna pawh za zela 35.79 atangin za zelah 42.28 a tling a, hei hi India hmarchhak state zingah a sang ber bawk.

Thingtlang lama broadband connectivity punna pawh za zelah 71.4 atangin za zelah 79.54 a kai pha a, telecom tower pawh 1,211 atangin 1,335 a kai pha bawk.

Mizorama telecom tower punna chu za zelah 0.98 atangin 1.07% a kai a, hetihlai hian India hmarchhaka tower density chu 0.81% a ni.

Economic Survey: Mizoram 2022-23-in a tar lan danin Mizoramah mobile phone connection nei 14,83,213 an awm a. Airtel chu hmangtu ngah ber a ni.

Service provider hrang hrang zingah Airtel hmangtu mi 7,06,184 an awm a, Airtel dawta hmangtu ngah ber, Jio hmangtu 3,94,400 an awm. BSNL hmangtu mi 2,08,056 an awm bawk a, Vodafone-Idea chuan hmangtu mi 1,02,573 an awm bawk.

Mizoram district hrang hrang zingah Aizawl district-ah mobile phone hmangtu tam berin mi 7,27,524 an awm a, Lunglei district-in dawtin 2,32,422 hmangtu an awm bawk.

Mamit district-ah 66,167, Champhai district-ah 1,09,244, Serchhip district-ah 96,442, Lawngtlai district-ah 79,348, Siaha district-ah 68,348 an awm.