Inbiakna tharlam

India leh China hian December khan Ladakh khawchhak lama an inrinaa buaina chungchangah hian sipaiten inbiakna an huaihawt leh a, inrem lohna an neihah te inremna a awm theih nan hma lam an pan nia ngaih a ni.

Ram hnihte hian an ngaihdan ve ve bakah inrem lohna siam that a nih theih nan inhawng takin thil an sawi dun a, tun hnaia inrem lohna awmna hmunah himna a awm theih nan hmalak pawh an rel a ni.

Arunachal Pradesh-a Tawang sector-ah, Yangtze hrula buaina a chhuah hnu ni 11-ah sipai lalte hi an indawr leh a ni a, darkar 10 vel an inbia.

India hian ram hnihte inepna hmun hnih, Ladakh khawchhak lama Demchok leh Depsang-a boruak sang la awm chu a rang thei ang bera chin fel a duh a ni.

Beijing-in Ladakh-ah sipai leh an hmunhma a chhawpa a din belh zel a nih chuan Indian leh Chinese sipaite chu nasa zawka an inep thar a rinawm hle niin Reuters chuan a tar lang.

Ladakh Police-in confidential research paper a buatsaih, ‘Security Issues Pertaining to Unfenced Land Border’ tia a hming vuaha tun hnaia police officer lawk chin conference-ah a thehluhah a ziak a ni.

Intelligence Bureau (IB)-in January 20-22 chhunga conference a huaihawt hi Prime Minister Narendra Modi leh Union Home Minister Amit Shah te pawhin an hmanpui a ni.

Inteligent-te atanga hriat dana an thlir lawknaah ramri hnaiha duty tual chhung police leh tun hnai kum eng emaw ti chhunga India-China sipai inep dan thlirin Ladakh-ah hian nasa zawka inepna a thleng thei niin Reuters chuan a tar lang a ni.

Kum 2020-a Ladakh-a ram hnih sipaite intihbuainaah khan sipai 24 vel an thi a; mahse, sipai leh ram palai indawr hnuah boruak a ziaawm zui a. December maiah khan Arunachal Pradesh-ah buaina a chhuak leh a, thi erawh an awm lo.

“China-a thil kal vel dan leh heng lai hmunah eibar zawnna lama hma a lak dan thlir hian People’s Liberation Army (PLA) hian sipai hmunhma a din belh zel hmel a, hei hian intihbuaina lian zawk a hring thei,” tiin research paper-ah hian tar lan a ni.

“PLA-in Chinese lama hmunhma an siam hian ram hnih sipaiten an chet dan an inthlirsak tawn reng a, laipui leh sipai chet velna te pawh an inthlithlai a. Buaina leh boruak sosang thlir thei thlir mek lai hian kum 2013-2014 atang khan kum hnih thum danah a sang zel a ni,” tiin tar lan a ni bawk.