India-in record thar a siam zel

Admin - Apr 13, 2021

Hri kai enkawl lai nuai 10 tling leh tawh

India rama coronavirus hri leng kai chu an pung chak chhunzawm zel a, darkar 24 liam ta chhung khan mi nuai zetin kai belh lehin ni khata kai hmuh chhuah tam zingami a ni.

India-a hri leng kai tawh zawng zawng hi mi 13,205,926 chuan an tling ta.

Nikuma hripui leng a tawrh tan tirh atanga chhiarin India-ah hian ni nga zet darkar 24 bia nuai chuang hri kai an awm tum ngana a ni ta.

April 5 khan a vawi khat nan nuai chuang kai awmin mi 1,03,558-in an kai a. April 7-ah 1,15,736 awm lehin April 8 leh 9-ah mi 1,26,789 leh mi 1,31,968-in an kai a. Darkar 24 liam ta chiahah a aia tamin an kai tih finfiah leh a ni.

Hri kai damlo enkawl mek pawh nimin khan nuai 10 an tling leh ta a. Mi 10,46,631 enkawl mek awmin hei hi hri kai hmuh chhuah tawh zinga 7.93% tihna a ni.

Nikum September thla khan hri kai enkawl mek hi a vawi khat nan nuai  10 an tling a. September 20, 2020 khan nuai 10 chuang awmin hei hi hri leng thawh khatna vanglai intan chhoh lai a ni.

November vel atangin hri kai tam lutuk chu ziaawm hret hretin January atang phei chuan a hniam hle tawh a, damlo pawh an tlahniam chak.

February 12 khan damlo enkawl mi 1,25,926 chauh an awm hman a, hemi hnu thla hnih lekah hian nuai kua vel an awm belh leh hman thung tihna a ni.

Darkar 24 liam ta chhung khan hri kai enkawl dam mi 77,567 zet an awm leh hman a; mahse, a let deuhthaw kai thar hmuh chhuah an awm ve thung avangin damlo mek zat hi a pung zawng zelin a kal lo thei lo.

Darkar 24 liam ta chhung hian nunna chân mi 794 an awm belh bawk.

Tuna hripui thawh hnihnaah hian Maharashtra leh Chhattisgarh chu a tuar na ber niin Chhattisgarh-ah mi 11,447 leh Maharashtra-ah mi 58,993 kai an awm belh.

Darkar 24 liam ta chhungin hri kai leh kai lo sample nuai 11 chuang endik a ni a. A hma niah nuai 13 chuang endik a ni ve thung.

Share now