India-a sum lam thubuai chhuitute chuan smartphone siamtu, Vivo-in an chhawr Chinese an man tih an firm chuan an sawi.

Indian thuneitute chuan he thil hi engmah an la sawi ve lo va; mahse, Vivo chuan an hnathawk, Andrew Kuang-a chungchang hi ‘dan anga tih theih apiang an ti dawn’ tih an sawi.

Nikum khan thuneitute hian Vivo pisa hi India atanga China-a dan lova pawisa thawn thina puhin an lo dap tawh.

Samsung dawtah Vivo hi India rama smartphone brand lian ber a ni tih industry data chuan a tar lang.

Vivo-a thawk Chinese mi man hi India leh China inkar a khik zau mek laia thleng a ni.

Kar hmasa khan Reuters chuan Indian police-te hian Chinese thuthlung leh thuvawn (propaganda) puang thintu, news portal NewsClick hnenah Vivo hian dan lovin pawisa an pe niin an lo puh tawh a. News portal hi Chinese propaganda thehdarh chungchangah chhui lai mek an ni.

Thawhlehnia Kuang-a man hi Prevention of Money Laundering Act (PMLA) tlawhchhanin a ni a. Dan thiamte chuan he dan hi a khirhin ram dang nena indawrna kawnga sum lama dan bawhchhiate hremna leh man theihna a nih thu an sawi.

Vivo hi chhiah pe tha lo niin tax enforcement agency chuan an puh bawk a. China-a BBK Electronics ta an ni a, an company hian India-ah hian brand dang, Oppo leh Realme pawh an zuar.

Thla 18 liam ta chhung khan Indian thuneitute hian Chinese mobile phone company dang lo bitum a nei nual a, heng zingah hian Xiaomi pawh telin $ makdatuai 670 zet an thil khawih chet theih lohvin a siam mek.

Kumin kumtirah khan India-a Minister of state for Electronics & IT Rajeev Chandrashekhar chuan parliament rorel inkhawmah Chinese company-ten chhiah pek tur pek loh $ tluklehdingawn 1.1 zet an nei tih a lo sawi tawh a. Sorkarin heng sumte hi hmuh tumin bei hle mah se 18% chuang awrh chauh a hmu thei niin a sawi.

Chinese company-te aiawha India-a dan hre mi chuan hetianga Delhi-in chet a thawh vak hi kum 2020-a ramria an intihbuai tuma India sipai 24 zet thah an nih thu kal zela Chinese sorkar a nawrna niin BBC hnenah a sawi a. Sipai intihbuaina a thlen hnu lawkah khan India hian a ram chhunga Chinese app tam tak hman a khap zui a, heng zingah hian TikTok pawh a tel.

Ladakh-a ram pahnih sipaite an intihbuai hnuah khan inthenawm ramte inkar hi a tha lo zui viau a, tun hnai maiah khan India chuan China-in map an tihchhuah thara a ram chin a tar lanah Arunachal Pradesh a telh pawh a hnawl fithla thak tih a lo sawi tawh.