Yonex Sunrise All India Sub Junior Under- 15 &17 Ranking Badminton Tournament khelh mekah Mizo naupang/rawlthar pahnihin final an lut a, pakhatin semifinal a thleng bawk.

Uttar Pradesh, Lucknow khawpui-a tournament khelh mek hi kar kal ta Thawhlehni atanga khelh tan kha niin Ningani zan hian zawh tura ruahman a ni.

Final khel tur pahnihte hi H. Lalthazuala leh Malsawmhlua (Mama) te an ni a. Ralte Villa Badminton Club-a khel lai ve ve niin Chanmari West rawlthar, Thazuala hian U-17 Boys singles-ah final lutin Serchhip naupang, Mama hian U-15 Boy’s Double’s a tanpui hnam dang nen final khelh an hmabak bawk.

Pullela Gopichand Badminton Academy (PGBA)-a inzira awm mek, Mama hi Pathianni hmasa maia khelh zawh tak, India ram pum huapa badminton inelna, Yonex Sunrise 2nd Ashwini Gupta Memorial All India Sub-junior Ranking Badminton Tournament 2023-ah a kawppui, Andhra Pradesh naupang, Mahendra Kalahasthi nen Under-15 Boy’s Doubles huangah an lo champion tawh bawk a ni.

Mizo rawlthar zingah Ralte Villa Badminton Club player tho, Lalramsanga pawhin U-17 Boy’s Doubles-ah semifinal a lut a; mahse, Thawhtanni zan khan semi final-ah a chak lo zawkah tangin final an lut pha ta lo thung.

Mizoram Badminton Association (MBBA) chuan Mizo player pathum - Zuala, Ramsanga leh Mama te an lawmpui tak zet tih an sawi a, an hmabak khelh tur atan duhsakna an hlan bawk.