Asia chhim lama awm kan ram India hi a tlawhtute tana hmun nuam tak a ni. He ram hian khualzin hiptu langsar Taj Mahal bakah Himalaya tlang a nei a, ram danga awm lo nungcha chi hrang tam tak an awm bawk. 

Mihring tamna ram India-ah hian ram dang miten an la hmelhriat ngai loh chaw tui tak tak hmuh tur a awm a, national park tam tak a awm bawk. Kan ram chhung mah nise hriat loh thil kan neih nual theih avangin tun tumah chuan India ram chungchanga i hriat tur pawimawh zual thenkhat kan tarlang dawn a ni.  
 
1. Khawvel-a population tam ber dawttu India
India hi tun dinhmunah khawvela mihring cheng tam ber pahnihna niin China an sang ber a ni. India mipui hi billion 1.3  bawr vel nia chhut kan ni a, a khawpui lian pahnih Delhi leh Mumbai-ah hian mihring maktaduai 10 chuang ve ve an cheng a ni. 

Kum 1951 khan India hian developing country zinga a hmasa ber ni turin family planning programe a kalpui tan a, UN hnuaia Department of Economic and Social Affairs te rin danin 2030-ah chuan population hian billion 1.5 an tlin rin a ni a, 2050-ah phei chuan billion 1.64 kan tlin rin a ni. 

2. India-ah chuan bawngpui te hi ran thianghlim-a ngaih an ni
Sakhuanaah chuan Hinduism zuitu an tam ber a, chu vangin ram chhungah chuan bawngpui hi ran thianghlim ang a ngaih an ni.  Bawng te hi Hinduism rin danah chuan ran thianghlim niin an veng him a, an chawimawiin an zah em em a ni. Hindu Pathiannu Bhoomi chu lei aiawhtu niin bawngpui angin a inlan thin niaah an ngai. An khawih nat ngai loh vangin khawlaiah pawh bawngte hi an lal em em thin a ni. 

3. Khawvel khawpui upa ber zinga ami Varanasi khawpui
Uttar Pradesh state a awm Varanasi hi India ram a hmun thianghlim pakhat niin Hindu ho thlarau chawmtu pawimawh anga ngaih a ni. Varanasi-ah hian mihring maktaduai 1 an cheng a, Varanasi khawpui hi BC11-na hunlai vela din tawh ni a hriat a ni. India khawpui pawimawh tak pakhat niin Ganges River kiangah a awm a, Hindu ho tan hmun thianghlim niin an tlawh uar thin hle nghe nghe. 

A kiang lui kama temple sak hi 2,000 chuang awmin chung zingah chuan Golden Temple hi a lar ber pawl a ni ngei ang. 

4. Khawvel-a billionaire tam ber pathumna India
India ramah hian a mi cheng mipui te kan in tluk tlang lo hle a, kum 2019 khan an chhut dan chuan Indian mi hausa 10% te sum neih hlutna hi a ram mipui sum bawm atanga tehin 80.7% a tling phak hial a ni. Chumai nilovin population atanga chhut a, ram pum sum lakluh atanga chhutin top 1% te sum lakluh hi 21% a tling phak daih a ni.

USA leh China dawta billionaire ngah ber ram chu India hi a ni a, ram pum huapin billionaire 140 bawr an awm mek.

5. Khawvela cricket ground sang ber
Khawvel-a cricket ground sang ber chu Himachal Pradesh-a Chail hmuna awm Chail Cricket Ground a ni a, India ram a mi a ni. Kum 1893 khan siam a ni a, tunah tak chuan polo ground atan an hmang rih. A awmna hmun hi a sang em em a, meter 2,144 vel a sang a ni. Chail Cricket Ground hi sea level atanga feet 7500 a sang a awm a ni.