ZALEN August 5, 2025 : India rama sawrkar damdawi in tha bik tehna-ah Primary Health Centre pahnih – Khawlailung PHC leh B airabi PHC bakah Urban Primary Health Centre pahnih – Lawipu UPHC leh Sihphir UPHC te an tel thar.

Dr. Lily Chhakchhuak, Mission Director, National Health Mission, Health & Family Welfare Department chuan damdawi in tha bik tehna, National Quality Assurance Standards (NQAS)-ah Khawlailung PHC, Bairabi PHC, Lawipu UPHC, leh Sihphir UPHC chu an tling thar a, a tehnaah (a indawtin) 93.84%, 84.89%, 93.63%, leh 93.93% an hmu tih a sawi.

Mizoram puma PHC awm zingah NQAS National Certificate hmu hi 28 awmin, Urban PHC zingah 5 an awm ta a ni.

Heti hian Mizoram chhunga Sawrkar damdawi in 41 te chu NQAS National Certificate nei tawh an ni a. Tunah hian sawrkar damdawi in 18-in state level certificate neiin national certificate result nghak mek 3 an awm bawk a ni.

Health Minister Lalrinpuii chuan, India rama damdawi in ṭha bik thlan chhuah zingah Mizorama damdawi in an awm belh zel chu lawmawm a tiin damdawiin, district leh state-a thawktu zawng zawng te thawhrimna leh taimakna chhuanawm a tih thu a sawi a. Certified Hospital-a in enkawl theih hrang hrang te mipui ten zirchiang a, tangkai takin hmang se a duh thu a sawi.

National Quality Assurance Standards (NQAS) Certified damdawiin te hi endikna chhawng thum paltlang an ni a, a tawp bera endikna an hmachhawn hi National External Assessment a ni. Hetah hian 70% an hmuh chuan certified an ni chauh thin a ni.