ZALEN, Apr. 01, 2025: Mahindra & Mahindra Ltd. chuan tangka kum (Arpil, 2024 - March, 2025) an khar rualin Sports Utility Vehicle (SUV) 5,51,487 an hralh a, an company chanchina kum khat chhunga SUV nuai nga an hralh vawi khatna niin tangka kum kal ta, April, 2023 - March, 2024 aia an hralh chhuah a punna 20% a tling.

Thla liam ta, March, 2025 chhungin hma an sawn hle a, lirthei hrim hrim 83,984 an hralh a, March, 2024 nen khaikhinin 23% ngawtin a tam a. Thla liam ta chhungin India-ah Mahindra hian fak an hlawhna SUV ringawt 48,048 an hralh a, nikum March aiin 18%-in a pung bawk.

Tangka kum kal ta chhunga hmasawn, Mahindra hi SUV bikah Indian lirthei bazara chungnung ber No. 1 a ni a, passenger vehicle (private car) hrim hrim huangah pawh sum an lak luh atanga chhutin pahnihnaah an invawrh sang bawk.

India chhul chhuak dik tak, Mahindra hi electric car siam kawngah pawh sawi hlawh a ni chho mek a, an company hnuaia Automotive Division President Veejay Nakra chuan, “Tangka kum kan khar dan a tha hle a, India ramah kum khat chhungin SUV nuai nga kan hralh vawi khatna a ni. Keimahni siam liau liau electric SUV kan pe chhuak tan a, mipuiin an duh hle tih kan hre thei nghal bawk,” a ti.

Mahindra car siam chhuah zingah Scorpio, Thar leh XUV7OO te chu SUV zinga Indian mipui duh a ni hlawm a, XUV3OO chu thiamna sang leh changkang zawka thuam thain XUV3XO tiin an chhuah thar bakah Bolero-in ngaihven a la hlawh reng a; Scorpio-N leh Thar Roxx an tlangzarh thar atangin SUV lamah bu an khuar thuk leh zual.

A bikin Thar Roxx phei chu lei duh tan nghah chhung a la rei a, Mizoram dealer Mana Motors pawhin an harsatna tawh mek a nih thu sawiin hauh lawk 200 vel an neih laiin thla khatah 8/10 vel bak an dawng thei rih lo.

India rama car hralh hnem ber ni thin, hatchback chu hun eng emaw lai atangin a tla hniam tial tial a, tunah hian passenger car hralh chhuah zawng zawng atanga 50% chu SUV a ni tawh a, he huangah hian Mahindra a chet that miau avangin a hma lam a pan zel.

Hetih lai hian Mahindra hian electric vehicle leh hybrid (electric leh combustion engine inkawp) siam chhuah nan Rs. vaibelchhe 27,000 an ruahman a, hei vang hian thil awm dan inthlak mekah India rama car company dang laka hma an hruai a tih theih a, thingtlang lama hman theih tur leh ruahtui tamna hmun nena inmil tur siam chhuah kawngah ke a pen tel bawk.

An company phenah hian mi pakhat pawimawh deuh a awm tel niin an sawi thin a, ani hi Indian mipui ngainat leh automobile lamah phei chuan an ngaisan a ni tial tial a, chu chuan Mahindra a vawrh san phah niin mi thenkhat chuan an sawi.

Chu mi chu Mahindra Group chairman Anand Mahindra a ni a, ani hi mual liam ta, Ratan Tata ang deuh mai khan Indian mipuiah a tla na sawt hle; social media X a hmang nasain a thu puanzarin awmzia a neih ṭhin bakah Indian media (a bikin lirthei lam)-in an um zui nasa.

Kum 2022-a deuha lar hluai, Mizoram tihmingṭhatu traffic inthununna ṭhat bikzia entawn tlak a ni tiin X-ah Sandeep Ahlawat chuan pho langin a tar lang chhawng ve leh a, a darh phah hle a ni.

Kum 2024 a tawp rual khan Mahindra chu khawvela car company hrang hrang zingah, lirthei bazara an hlut dan aṭanga tehin brand hlu 11-na a ni phak a, dollar zawnga chhutin tluklehdingawn 43.12 hua ngaih a ni.

World Statistics-in a tar lan danin - 1. Tesla (USA), 2. Toyota (Japan), 3. BYD (China), 4. Xiaomi (China), 5. Ferrari (Italy), 6. Mercedes-Benz (Germany), 7. General Motors (USA), 8. Porsche (Germany), 9. BMW (Germany), 10 Volkswagen (Germany) te chu Mahindra aia hlu an ni a, Indian car zinga hlu ber a ni ve thung.