ZALEN February 16, 2025 : India rama university tha leh tha lo tehtu, NAAC-in an tehnaah Mizoram University chu Grade ‘A’ la hmu chho zelin tehna hrang hranga tehin university tha pawl a la ni tih Mizoram University Alumni Association hruaitute chuan an ti a, dinhmun sang zawk luah turin mipui an pawimawh tih an sawi.

Aizawl Press Club-ah chanchinbumite kawmin Mizoram University Alumni Association (MIZUAA) hruaitute chuan MZU atangin Mizo ringawt pawh Group ‘A’ officer mi 400 chuang an chhuak tawh niin an sawi. MIZUAA President Dr. Henry Zodinliana Pachuau chuan, “MZU hi kum 2011 daih tawh a din kha a ni a, an hnuaia pawl peng hrang hrang awmah MIZUAA hi a pawimawh berte zinga mi kan ni a. UGC-in a phut angin nikumah khan society angin kan in-register thlap a ni,” a ti

“MIZUAA hi MZU atanga pass chhuak tawhte tana pawl din a ni a, kan hnuaiah hian Mizo chhenfakawm tak tak te, hna hrang hrang a nihna pawimawh tak tak chelhte an awm nual mai a, MZU product ngei hlawtling taka an awm chhote hi kan chhuangin kan lawm hle a. A member ang pawhin kan tam hle a, kum 2001 atanga pass chhuak tawh hrim hrim kha chu a huam vek a ni,” tiin MZU atanga chhuakte chu an pawla tel vek turin a sawm.

Dr. Henry Zodinliana Pachuau chuan dinhmun sang zawk luah turin mipui an pawimawh ti, he university hian hma a sawn theih zelna turin zirlai an pawimah tih a sawi a, zirlai chhuak tawh te member an nih a pawimawh a ti.

Hma la turin zirlai chhuak te an pawimawh a ti a, tunah chuan zirlaite an pawimawh avangin an fund pek dan pawh an thlak tih sawiin, "Membership fee Rs. 500 a ni tiin kum 2001-2019 thleng kha chu a duh apiangin a pek anga kal kha a ni. Kum 2020 atang khan kan hotuten remruatna tha zawk neiin, zirlai, an zir zawh hmaa fee an pek apiangin MIZUAA fund hi pek nghal ngei ngei tura tih a ni tawh,” a ti bawk.