Hman ni maiah India ram pum huap inelnaah Mizo naupang a champion tawh a, tunah Mizo rawlthar champion an awm leh ta.

Yonex Sunrise All India Sub Junior Under- 15 &17 Ranking Badminton Tournament khelh mekah Thawhlehni khan Chanmari West rawlthar, H.Lalthazuala chu U-17 Boys Singles-ah a champion.

Kar kal ta Thawhtanni atanga Lucknow, Uttar Pradesh-a tournament khelh mekah hian Ralte Villa Badminton Club-a khel lai, Thazuala hian final-ah Pranauv Ram N chu straight set (21-16, 21-16)-a hnehin champion a ni.

Thazuala hi Tata Trust hmalaknaa Pullela Gopichand Badminton Academy (PGBA), Hyderabad, Telengana-a in zir mek a ni a, tun tournament-ah hian a che thain a hmaah hian tumpui apiang ‘dawl zawrin an zawr’ tih ngam a ni.

Seeded No. 6 niin tournament hi a hmachhawn a. First round atanga final thlengin game hloh miah lovin straight set vekin a chak a. Semi final-ah Gnana Dattu T. T chu 21-11, 21-16 a hnehin final-ah pawh awlsam tak thovin hnehna a chang zui a ni. 

Chanmari West rawltharin chanchin lawmawm a neih mek lai hian Mizo naupang, Malsawmhlua, Serchhip chu U-15 Boy’s Doubles-ah final-ah a kawppui nen hnehna an chang zo ta lo thung.

Thazuala ang bawka PGBA-a inzira awm mek ve tho, Mama hi Mahendra Kalahasthi nen an inkawp a, final-ah hian Seeded No 1 Arjun Tanaji Birajdar leh Aryan Tanaji Birajdar te tangdun lakah game la hmasa zawk mah se 17-21, 26-24, 20-22 in an chak zo ta lo a ni.

Ralte Villa BC-a khel lai ve tho, Mama hi Pathianni hmasa maiah khan a kawppui, Andhra Pradesh naupang nen hian Yonex Sunrise 2nd Ashwini Gupta Memorial All India Sub-junior Ranking Badminton Tournament 2023-ah Under-15 Boy’s Doubles huangah an lo champion tawh bawk a. Hemi tuma final-a an hnehte hi tun tumah hian an hneh zo ta lo thung a ni.

Mizo rawlthar dang, Lalramsanga, Durtlang, Ralte Villa BC pawh tun inelnaah hian U-17 Boy’s Doubles-ah semifinal a thleng a, final luh inchuhnaah a chak zo ta lo thung.

Mizoram Badminton Association chuan Thazuala, Mama leh Ramsanga te an lawmpui tak zet tih an sawi a. Hlawhtlinna changa Mizoram leh India ram tihmingtha zel turin duhsakna sang ber an hlan tih an sawi bawk.