ZALEN Nov. 5, 2024; Thirsakawr hmanga India ram, (State 28 leh UT 5) fang chhuak, LZ-a Varte chuan November 5, 2024 hian Aizawl a lut dawn a, Mission Veng YMA huaihawtin ropui taka lo hmuah a ni dawn.

Tarlan tawh thin angin, Lza hian January 25, 2024 khan Aizawl a chhuahsan a, Aizawl a rawn luh leh thlengin km. 16,850 vel a tlan tawh.

'Right to clean air' thupui nei a inkhalh a nih angin, a thlen chin state/capital hrang hrangah Pollution Control Board te nen inkawmna an nei thin a, boruak thianghlim awm theihna tur leh a pawimawhna te an sawiho thin. A thlen chin a piangah Pollution Control Board lamin an lo hlut hle zel a, Bihar-ah phei chian an Governor nen inkawmna an nei hial a ni.

Chawhrualin Lza hi nitin km 86.41 tlan ziah ang a ni a, ni 27.8.2024 khan km 207.82 a tlan a, hei hi ni khata a tlan thui ber a la ni.

Lza hian khawvela lirtheiin a zawh theih hmun sang ber Umling La a inkhalh thleng bawk a. Thirsakawr-a Lza inkhalh ang thleng phak hi Mizo zingah midang an la awm hriat a ni lo a, Thirsakawr ngata Umling La thleng pawh hi Mizo dang an awm hriat a ni lo bawk.

November ni 5, 2024 ah Aizawl a lut anga, Mission Veng Branch YMA bultumin Mission Veng bazarah ropui taka lo hmuah tum a ni a, zanin dar 7:30 a hman tur programme pawh duan fel tawh a ni.