Aizawl January 9, 2023: MNYF Headquarters chuan Central YMA buatsaiha Bangladesh atanga raltlante thlavang hauhna inkhawm neih a ni chu lawmawm an ti a, an thlawp tlat tih an sawi a, India sawrkar chu United Nation Rufugee Convention 1951 leh 1967 pawm ti a ni lo chungin Zoramthanga kaihhruai MNF sawrkar chuan a theih ang angin a chawmdawl reng niin an sawi.

Mizo National Youth Front chuan India sawrkar chu United Nation Refugee Convention 1951 leh 1967 protocol pawmtu anih loh avangin Myanmar leh Bangladesh atanga raltlante chhawmdawl leh lo tuamhlawmna tur hi vawiin thlengin sawrkar laipui chuan a ngaihsak duhlo, an ti. "Mizoram-ah chuan Zofate Inpui MNF in rorelna a chanlai anih avangin Zoramthanga kaihhruai MNF sawrkar chuan raltlan mangang taka awmte chhawmdawl hna hi a theih ang tawkin a kalpui mek," an ti bawk.

MNF Thalai chuan Bangladesh ramchhunga Zohnahthlak chen tamna hmun Chittagong Hill Tracts ah hian hmasang atanga lo cheng hmasa tawh Zohnahthlak ten nekchep an hlawh nasa tawh hle a, hnam anga an dinchhuah theihna turin an chenna Chittagong Hill Tracts ah hian thuneihna sang zawk Bangladesh sawrkar lak atangin an sual mek, an ti. "He thil avang hian Kuki-Chin National Army (KNA) ten thuneihna sangzawk beiseia hma an lakna avangin Mizoram ah raltlan 370 chuangzet an rawn lut tawh a. Heng raltlan rawn lutte hi Mizoram sawrkar chuan a theih ang anga lo tuamhlawmin, ei leh intur te, intuamlumna tur puanlum bakah; a mamawhte hnenah damdawi a thlawnin a semchhuak mek a ni," an ti.

Bangladesh atanga raltlante Mizoram sawrkar in a theih ang tawka tuamhlawm hna a kalpui mek lai hian sorkar laipui a Union Home Ministry in BSF kaltlanga zohnahthak Mizoram-a rawn luhtum a dantir thin chu MNYF chuan pawi an ti a, sawrkar laipui hmalakna an dem a. Mizoram sawrkar leh Mizoram aiawha MP pahnih C.Lalrosanga leh K.Vanlalvena te hmalakna chuan rahtha a chhuah thuai an beisei bawk.

MNF Thalai chuan Myanmar atanga  raltlan, Mizoram chhung hmun hrang hrang camp 160 a awmte tuamhlawmna turin Mizoram sawrkar chuan cheng nuai 400 chuangzet a semchhuah tawh bakah zirlai naupang 6000 chuangzet chu an zirna engkim tumsakin a thlawnin a enkawl mek, an ti a. Hei bakah hian Bangladesh atanga zohnahthlak raltlante tuamhlawmna turin January thla chhung hian nuai 35 chuang an mamawh leh tul ngaihtuahna turin tanpuina a kaltir tawh, an ti bawk.