ZALEN August 22, 2025 : India rama chanchinbu lian leh rintlak zingami India Today-in tun hnaia India Best University ranking a tihchhuah tharah General (Government) Category-ah Mizoram University chuan 25 na a hauh a, nikum lam aiin hma a sawn hret.

India Today tehnaah hian nikum lama pahnihna University of Delhi, New Delhi chu pakhatna a ni a, nikum lama pakhatna Jawaharlal Nehru University, New Delhi chu pahnihna a ni a, Aligargh University, Aligrah chu pathumnaah bawk a awm leh a, University of Hyderabad chu palina niin Osmania University, Hyderabad chuan panga na a ni.

University tha hi chi sariha teh a ni a, top 45 chinah India hmarchhak University zingah Mizoram University bak langpha an awm lo, nikuma khan 26 na niin rank khatin hma a sawn a ni. He tehnaah hian Overall score chu 2,000 a ni a, hetah hian pakhatna University of Delhi, New Delhi hian point 1,780.1 a hmu a, Mizoram University hian 1,153.1 a hmu pha a ni.

Mizoram University hian Academic & Research Excellence lamah sulhnu a nei tha hle a, score 250-ah 152.0 a hmu a, University of Delhi, New Delhi chuan 174.4 a hmu a ni.