DOWNLOAD OUR APP

Read latest news on your phone
app-store

INDIAN INSTITUTE OF MANAGEMENT (IIM), KOZHIKODE DAI-AH - II

Jul 17, 2022

Class room kha Professor ten min thlen khalh deuh reng mai a nih chu! Tum khat chu kan Prof pakhat minute 3 velin a rawn tlai hlauh mai a, classroom ni lo zawkah min lo nghah vang chu niin! Minute 3 leka tlai pawh kha a inthiam lo hle a, ngaihdam a dil chul mai a ni.

Subject chhung lam

i) Public Private Partnership (PPP) chu: A tawi zawngin PPP chu Sawkar leh Private company te leh mipuite inpeizawn tawn a, hmasawnna ruhrel siamho hi a ni a. Public Private Partnership Model hi kum 1990-95-a India ram Economic reforms a rawn awm khan kalpui tan a ni a.

Kum 2015-16 budget speech-ah Union Finance Minister-in PPP Mode chu thar thawh a ngaih leh thu a sawi a. Committee dinin Vijay Kelkar kaihhruaina hnuaiah zir chiangin- PPP Mode hi sum lama hlawkna ngawr ngawr aiin Service tha zawk mipuite hnena pe thei tura ruahanna siam thar a tul thu tarlan a ni.

PPP Investment Model-ah chuan Private Company ten Investment rawn tiin, a ruhrel sak/din, a enkawl hna leh services mipui hnenah an thawk ang a, a hlep awm theite pawh an tel ang. Sawrkarin lamin a hmun hma leh dan leh hraite a kengkawh thung ang. Chu service chu man chawi ngai a nih chuan mipuiten a man (user charges) an pe ve thung ang. Entirna mawlte lo tarlang ila: PPP model atan Hospital din lo thlang ta ila. Hemi atan hian Private company ten Hospital building sakna tur senso an tum ang a, Doctor leh medical staff- te pawh a thiam thiam an ruai ang, a hmunhhma erawh sawrkarin a pe ve thung dawn a ni. Chumi hman man chu mipuiten kan chawi ve thung ang. Hetiang lo pawh hian kalpui dan kawng hrang hrang a awm thei a, kan sawi vek seng lo ang.

Sawrkar-in Infrastructure tha din tura sum leh pai lama harsatna a neih chang a awm fo thin. Chung hunah chuan Pvt. company-te invest turin a sawm a. Tuna Delhi Airport khu PPP mode-a kalpuia a ni a, tun tleng hian World Class Airport an nei thei a ni. Sawrkar tana enkawl hautak tak - kan Airport te, kan Public transport te, Power & Electricity chungchang te, kan Health Care System te thleng hian PPP model a kalpui chi a ni em? tih erawh a chhiartu ngaihdan ni se.

ii) Project Impact Evaluation: Sawrkarin Programme emaw Scheme emaw Project eng pawha kalpui reng rengin a hlawhtlinna teltu turte ngun takin a ngaihtuah thin a. Project hlawhtlin leh hlawtlin loh tehna pawimawh tak chu Impact Evaluation hi a ni. Kan ramah project siamin Central lam atang pawn sum kan hailut tam narawh e. A tha! Amaherawhchu, heng kan project siamte hian engti ang chiahin nge mipuiah rah tha a chhuah tih erawh kan chhut let fo a ngai thung a ni.

Project hlawhtlin leh tlin loh chung changah heng thil palite hi kan enchian a ngai hle: Input, Output, Outcome & Impact te hi! Entirna mawlte han sawi leh ta ila: Thil zuar Company pakhatin TV-ah sum tam tak sengin advertisement a chhuah a. Chu advertisement chuan engti ang chiahin nge Sales-ah hlawkna a thlen tih a chhut let a ngai a ni. Chutiang bawkin sum tam tak seng a, Sorkar programme advertisement kan tihte hian eng ang chiahin mipuiah nghawng a neih tih kan chhut let thin em? Belh leh paih(Quantitvative analysis) hmanga chhut theih a ni kher loh mai thei, mahse, mipui rilru sukthlek erawh a teh theih thung a ni. Eg : Exit Poll. Chu ai maha pawimawh zawk chu- Vaibelchhe tel man teh meuh Project lian tak tak kan siamte hian mipuite khawsak phung tha zawkah a thlen em? Nge, kan project-te hi mi tlemte hlawkna mai mai tur tih kan zirchian fo a ngai ni. Chu chuan Programme leh Scheme kal mekah thutlukna dik a siam ang a, Programme kalpui zel dan tur pawh a hril dawn a ni. Kan Sawrkar Programme kalpui tawhte- MIP leh NLUP te kha Impact evaluation mumal tak neiin, chumi results atang chuan tuna SEDP kalpui mek pawh hi tha lehzuala kalpui dan a awm ngei ang.

iii) Political Payment & Economic Freedom: Mizo tawng ang maia kan hman tawh ‘Corruption’ chu tawngkam thar ‘Political Payments’ tiin an lo sawi a. Ancient Rome leh Medieval China hun lai atang daih tawh khan an Lal, Emperor-te intlawnsiakin ram leh an thil neihte pein he Political Paymenst hi an kalpui tawh thin a. Engkim kha an Lalte kutah a awm avangin Rome hun laia Alexandria’s Steaming Engine hmuhchhuahte kha Toys ang lekin museum ah hnuchhiah a ni a; Medieval China hun laia Paper, Compass, Sana leh Gun Powder an hmuhchuahte kha an Lalte kutah engkim thuneihna dah a ni. Chumi awmzia chu inkhuahkhirhna nasa tak avangin hma sawn zel turin Economic freedom a awm lo a, chu chuan an thil hmuhchhuahte hlutna a phawk chhuak lova, a tithuanawp tlat thung a ni.

Economic freedom a awm lohna ram apiangah eirukna- Malpractice/ Cooruption kan tih chu a hluar zel tiin zir mite chuan an sawi. India ramah pawh engkim Sorkar thuneihna sang tak, dan leh hrai khirh tak tak avangin hmasawnna duh angin a thang thei lo ti ila a sual lovang. Ram dang atanga bungraw tlawm zawka la lut turin dan kaltlang ngai tam tak a awm a, thawn chhuak turin dan paltlang a ngai tam hle bawk. Chutiang bawkin miin a chhehvela Sikul tha din turin Permit a neih a ngai a, Industry din turin Licence a neih a ngai a. Economic freedom/ Free trade a hniam a; khuahkhirhna paltlang thei tur chuan a kawng a thui a, hmuh a harsa a, a hautak a ni. A kawng awlsam ber chu thuneitute hnena puanhnuai thil, a man pek chu a ni. Chu chu a ni, Political Payments kan tih chu! Chu chu awlsam taka Business kalpui theih dan awm chhun a ni a, Political payments chu economic freedom thlaktu(substitute) atan hman a lo ngai ta a ni!

Ziaktu pakhat chuan, “Corrupt behaviour is a consequence of ‘rule of the game’, not a consequence of the ‘motifs of the players’ a ti. Chumi awmzia chu, ‘Eirukna hi a eirutu rilru sukthleng dik leh dik loh lam ai mahin kan dan leh hrai khirhkhiap lutukin a rah chhuah zawk a ni...tiin a lo sawi a. Hei hi corruption chungchanga thlirna tlang dang deuh ka han tar lang a ni e.

4. Khaikhawmna:

Aw le, kum 1990s chho khan India ramin sum leh pai dinhmunah nasa takin harsatna a tawk a, kan economy a thluchhe mek a ni. Chutah chuan, Dr. Manmohan Singh ten policy thar duang vatin, Economic Liberalisation kalpuiin Foreign Investor-te tan kawng zau tak a hawng a. Chu chuan Economic Recession atangin min chhanchhuak a. Tun dinhmun hi kan thleng ta a ni.

Vawiin hian state dang ang thoin keini pawh sum leh pai lamah harsatna kan tawk mek a ni a. Kan thawhchhhuah a beithamziate hi zep thu a cheng lo. Zau zawka hma thlir neih a, ram dang atanga Investment rawn ti duh an awm a nih chuan kawng kan lo sahhawn a pawimawh hle ang. Tin, kan ram chhung ngeiah pawh thawh chhuah leh thar chhuah kan neih ang angte chak zawka kalpui a nih theih nan kan dan hman mekte ennawn a; awlsam leh kawng zau zawk hawnsak dan kan ngaihtuah a pawimawh hle a ni. Chu chuan economic growth a tikang awk awk ang a, tin, dan phena Political Payments kan tihte pawh a tikiam zawk ngei ang.

Kan thlen tirh phat atangin engkim a hunah tih chat chat vek a ni a. A tawi zawngin sawi ta ila, thaw lakna hun a awm meuh lo a ni ber e! Class room kha Professor ten min thlen khalh deuh reng mai a nih chu! Tum khat chu kan Prof pakhat minute 3 velin a rawn tlai hlauh mai a, classroom ni lo zawkah min lo nghah vang chu niin! Minute 3 leka tlai pawh kha a inthiam lo hle a, ngaihdam a dil chul mai a ni.

Share now