ZALEN July 19, 2025: Vawiin khan Indian Red Cross Society (IRCS) Mizoram State Branch chuan H. Lalengmawia IAS Managing Committee Chairman hoin, Home pathum (3)-ah tanpuina an hlan.

IRCS Mizoram State Branch chuan, Grace Home Durtlang-ah Oxygen Concentrator- 5, Hmangaihna In Durtlang-ah Blanket- 30, Hermon Childrens Home Durtlang-ah Blanket- 30 an hlan. 

Managing Committee Chairman H. Lalengmawia IAS chuan, "Indian Red Cross Society hi tanpui ngaite tanpuitu a nih angin tanpuina hi pechhuak kan ni a. Ramin harsatna a tawh palha tanpuina hna thawk thei tura thalaite buatsaih hi Red Cross thiltum a nih bawk avangin, College hrang hrangah training kan pe mek a. IRCS Mizoram State Branch hi kan tuai thar mek a ni," a ti. 

Indian Red Cross Society (IRCS) Mizoram State Branch hi hun rei tak mumal lo taka a awm hnuah, tuai thar leh mek a ni a. Mizoram Governor General (Dr) VK Singh chu State President a ni mek a ni.