Lirnghing na takin Indonesia a sawi a, chhhiatna thlenga nunna chan zat chi mi 268 an tling tawh tih BBC chuan a tarlang. US Geological Survey chuan lirnghing nat zawng hi 5.6 magnitude a nih thu leh, lei chhungril km 10 vel atanga intan a nih thu an tarlang. 

Lirnghing nat zualna lai hi Cianjur, West Java niin, hliam pawh sang tel an awm. Thi zat hi a tirah mi 160 an ni a, hliam zingah thi an awm belh zel avangin nunna chan zat hi 268 a kai chho tawh a ni. Thi zingah hian school naupang eng emaw zat an tel a, chin hriat loha bo mek 100 chuang an la awm bawk. 

National Disaster Mitigation Agency (BNPB) chuan chin hriat loha bo hi mi 151 an la awm tih an sawi a, thi zat pawh hi an la pung chho zel mai thei a ni. Lirnghing hian in ding lai 22,000 chuang a sawi chim a,  mi 58,000 chuang chu hmun himah sawn an ni bawk. 

Indonesia hi lirnghing kal kawng langsar tak zinga mi a ni a, nunna chan pawh an tam tawh hle. Kum 2018 phei kha chuan lirnghing avanga nunna chan hi mi 2000 chuang zet an awm a, tsunami pawh an tuar nasa hle a ni. Kum 2004 khan Indian Ocean-a lirnghing leh tsunami avangin mi 230,000 an lo thi tawh bawk a, heng zinga a tam zawk hi Indonesia khua leh tui an ni.