Aizawl July 21, 2024 : Commerce & Industries Minister F. Rodingliana Industries department ram dan loa luahtute leh industry dinna tura allotment pek tawh, allotment pek an nih anga hmang lote chhuah tir emaw an allotment cancel tura hmalakna kal mek, hmalak tawh chin thlirletna leh chak zawka tihhlawhtlin dan turte rel a ni.

Commerce & Industries Minister F. Rodingliana hoin a Office Chamber-ah Industries ram thubuai chingfel tura hmalakna kal mek chak zawka kalpui dan tur nimin piah khan ngaihtuah niin Commerce & Industries Department, Revenue Department official te leh DC Aizawl te chu an thukhawm a.

Joint Meeting hian Industries ram huam chhunga dan lova awmte leh allotment anga hma la lo te chu insasengna hun pek ni se, huntiam ral rualin Joint Task Force din ten a hmunah kalchilhin thupek zawmlote zawnchhuahna neih ni se tiin a rel a ni.

Meeting hian document leh pass pe chhuak theitu dik tak (competent authority) in a pekchhuah ni lo hmanga industries ram lo luahte leh allotment hmang diklo te chu rang taka chhuahtir turin chak lehzuala hmalak zel a rel. Mi thenkhat industries ram zuar an awm thu leh heng ram te hi lo leisak lo turin mipuite chu fimkhur turin a chah.

Meeting hian Industrial Growth Centre (IGC), Luangmual ram chinfel chu hmalakna hmasaa neih tur anih thu leh a dang pawh rang taka hmalak chhoh zel anih tur thu rel a ni.