ZALEN July 21, 2025 : Tunhnaia Sports & Youth Services Minister Lalnghinglova Hmar leh Brigadier Vikas Rai Shandilya, Commandant, Assam Regimental Centre, Shillong te inbiakna kal zelah Aizawl Territorial Army company chuan nimin khan Lammual-ah pre-recruitment screening an kalpui.

Screening-ah hian Assam Regimental Centre atanga shortlisted candidate an neih infiammi 25 an tel a, ‘Aizawl International Half Marathon 2025’ a tlan tha bikte pawh an tel. An document leh hriselna endik bakah, infuihna leh hriattur pawimawh inhrilhhriatna hun hman a ni. Hei hi August ni 11 atanga Shillong-a Assam Regiment lak tur atan inpuahchahna a ni nghal a ni bawk.

Brigadier Vikas Rai hi tunhnaia Aizawl a rawn zin tumin Sports Minister Lalnghinglova Hmar nen inkawmna hun tha tak neiin, Assam Regiment-a Mizoram-in quota engemawzat a neih hman tangkai a nih tawk loh dan te an sawidun a. A bikin sports quota-a Mizoram atanga thalai thahnem zawk sipaia an luh dan tur ruahmanna an siam a ni. Boys Sports Company, Assam Regimental Centre, Shillong-a Mizo naupang an luh dan turte pawh an sawi bawk.

Sports Minister leh Assam Regiment hotu inbiakna bawhzui hian Sports & Youth Services Department leh Mizoram State Sports Council kaltlangin Mizorama sports association hrang hrangte chu infiammi, sipaia tang theite zawng chhuaka an hming thehlut tura ngen leh hriattir an ni tawh nghe nghe.