Aizawl May 29, 2023: Deputy Chief Minister Tawnluia chuan vawiin khan Millenium Centre Atrium-ah Tourist Guidance Information Kiosk leh hmeichhia te tana tul thuta pan ban mai tur  Sanitary Napkin Vending Machine a hawng a, mamawh apiangten tangkai taka an hman atan a hlan nghal.

Deputy Chief Minister chuan khualzin ten Mizoram chungchang hrilhhriatna, khualzinmite tana tangkai leh bengvarna tur, an veivahna leh hawiharh nan leh khawchhunga hotel leh hmun pawimawh an hriat theihna tur 'Information Kiosk' hawn theih a nih chu hmasawnna a nih thu a sawi. Hmeichhiate tana awlsam zawk leh an mamawh huna hman mai tur Sanitary Napkin Vending Machine mipuite hnena hlan a ni bawk chu lawmawm a tih thu sawiin, UD&PA Department hnuaia Smart City bakah Tourism Department-te chu fakawm a tih thu a sawi.

Deputy Chief Minister chuan ramchhung leh pawn atanga khualzin ten information an mamawhte pholanna Kiosk chu Aizawl khawpui laili-a hmun pawimawhah te bakah Lengpui Airport-ah bun a nih tur thu a sawi a, Kiosk atang hian khualzin miten Mizoram chungchang an hriat duhte an hre zung zung thei tawh dawn a ni a ti. Hmeichhiate tan a tul huna an mamawh an lam theihna tur Sanitary Napkin Vending Machine pawh sikul hrang hrang bakah Aizawl khawpui hmun thenkhat-ah dah mek a nih thu a sawi. Vantlang hmasawnna tura khawl bunte hi dimdawi thiam tur leh neitu rilru pu a humhalh tlat turin mipuite a chah a ni.