Aizawl May 25, 2023 : Mizoram Pradesh Youth Congress Committee (MPYCC) chuan vawiin khan Thingdawl leh Kolasib Rengtekawn-a Manipur state chhung buaina avanga raltlante awmkhawmna hmun tlawhin tanpuina an hlan. He hunah hian Congress Thalai President Laltawnliana chuan BJP chu sakhaw hrang betute inkara inhuatna leh tharum thawhna politics a hmang thin an nih avangin Manipur-ah pawh thisen a luan phah a, BJP leh a kaihhruai NDA zawmtute hriat a hun a ti.

Tanpuina hlannaah hian MPYCC President Laltawnliana chuan thu sawiin, "BJP hian hnam leh sawkhaw hrang hrang betute inkarah inhuatna leh tharum thawhna politics nasa takin a khel a, chumi rah chhuah avang chuan Manipur-ah nasa takin thisen a luang a. Nunna tam tak an chân a, Kristian-te Biak In thahnem tak hâl a nih bakah in leh lo tam tak hâl leh tihchhiat a ni bawk," a ti.

"Heti khawpa Manipur-a tualchhung buaina nasa a chhuah mêk lai a, India ram Prime Minister berin ngawih a chuh tlat mai hian BJP kaihhruai NDA sorkarah hian India ram a him lohzia a tilang a. India ram Hindu rama siam tumna kal zel hi kan dan chah a ngai a, BJP kaihhruai NDA zawmtute hi tute nge an nih kan hriat a hun tawh a ni" a ti. 

Congtess Thalai President chuan, "India ramah sakhaw hrang hrang vuantute leh hnam hrang hrangte inkarah Congress party chuan inlungrualna a zawng thin a, a zawng mêk zel bawk a, tun tum Manipur buainaah pawh All India Congress Committee chuan 'Fact-Finding Team' dinin, Manipur state an tlawh a, chuta an hmuhchhuah chu BJP sawrkar hian remna leh muanna bakah mipui ten nunphung pangngaia an nun leh theihna turin hma a la tawk lo tih hi a ni," a ti bawk.

"Zofate hi chhan hrang hrang vangin inṭhen hrang mah ila, thisen-a kan inzawm tlat avangin intuamhlawm tlat zel tur kan ni a. Tin, Zohnahthlak unaute kan insuihkhawm lehna tur kawng hi bumboh hle mahse, tun hun harsa kan tawh angte hi unau kan nih hlutzia tilangtu ni zel zawk rawh se," Laltawnliana chuan a ti bawk.

Congress Thalai-te hi an President Laltawnliana hovin mi sawmthum chuang Manipur atanga Zo hnahthlak rawn raltlante tanpui tur hian an thawkchhuak a, Buhfai, Dal, Alu, Neutrela, Silpauline, Gamchha, Damdawi chi hrang hrang leh hman chawp tur toothbrush, toothpaste, sahbawn leh mamawh chi hrang hrang an pe a ni.

Tun dinhmunah Thingdawl Polytechnic hmunah Manipur buai avanga raltan mi 124 an awm mek a, Rengtekawn Community Hall-ah hian raltlan 123 an awm mek a, Rengtekawn khaw mi fin te nen mi 236 Rengtekawn-ah hian an awm mek a ni.