Tunhnai maiah Mizoram hmun hrang hrangah inkhawihrawn/a huhoa midang kutthlakna a thleng ngun ta hle mai a. Kan hnung lawkah misual thenkhatin Khawzawl-ah matric exam lai chu kut an thlak avangin a boral a, a hnu lawkah Bawngkawnah inkhawihrawn/a huhoa midang kutthlakna a thleng a. Nimin piah maiah Sairang rawlthar 3 te chu Tlawng luia kal mi thenkhat ten kut an thlak rawn bawk.
A chunga tarlan mai bak pawh hi veng/khaw hrang hrangah a huhoa kut inthlak rawn/mi dang sawisak rawn hi tunhnaiah a thleng ta fo mai a. Mizote kûtpui ber, Chapchar Kût-ah pawh hian insualrawn emaw, inpheksual emaw, inkhawihrawn emaw ang chi hi a thleng deuh ziah a, a ngaimawhawm hle mai. A huhoa midang kut inthlak ang chi hi chu a thleng khat hle mai a. Inhmuhthiamloh vang leh ruihsual vang chuan mi thenkhat chu intithiam lovin an insual fo a, mahse kan pi leh pu hunlai atangin a huhoa midang kutthlak rawn ang chi hi chu thil thleng khat tak a ni.
Hetia inkhawihrawn a lar viau tak nachhan hi a bikin thalaiten Mizo nunmawi, ‘Aia upa zah’ an bosal tak vang niin a lang. Mi thahnemngaiten an ngaimawh em em mai chu aia upate zahna a tlahniam ta lutuk hi a ni a, eng emaw buaina thlen changin upa zawkten ban han pharin buaina thelhdaih an tum chang pawhin tleirawl/rawltharte hi thelh hleihtheih loh leh a pawr zawkah an tang ta deuh zel mai niin a lang a, a pawi hle mai.
Tun hnai thil thlengin a entir chu nasa lehzualin kan Zonun zemawi hi kan inzirtir thar leh a ngaih tih hi a ni. YMA leh mi thahnemngai ten Mizo ze mawi ‘Tlawmngaihna, Aia upa zah’ leh thil dangte a parvul leh theih nan an theih ang tawkin hma an la a; mahse, an hmalakna hian rah tha a la chhuah hleithei lo a. Chhungkua hi inzirtirna sikul tha ber a ni a, nu leh pa tam tak chuan kan rohlu ber kan fate aiin thildang kan buaipui a. Kan faten nunkawng dik lo an zawha, siamthat an har hnuah kan buaipui leh si thin. Kan fate nunkawng dika hruai turin nu leh pate hian mawh kan phur a, kan tih tur a ni tih hriain nasa lehzuala tan kan lak a pawimawh hle. Chuvang chuan kan rama Zonun ze mawi a vul thar leh theihnan nu leh paten mawh kan phur a ni tih kan hriat thar leh a tul ta hle mai.