ZALEN July 16, 2024; A hriat ngai loh te lirthei a tihpalh thu-ah ngaihdam dilna social media-ah post a siam a, lirthei neitu-in chu chu a lo hmuhin, a ngaidam mai ni loin, a tan thil ṭha tih sak a lo tiam let.

He thil thleng chungchang hi social media lamah a viral nasa viau a, lirthei tipalhtu leh lirthei neitu inchhanna hi mi tam takin ropui an tih thu leh chhiar nuam an tih thu comment an pe a ni.

Hei hi a ni 'Zonunmawi' chu, lirthei tipalhtu hian a thil tih hi ngawihbopui pawh nise, hriatchhuah a ni kherin a rinawm loh. Mahse, a chhungril a 'dikna' chuan ngawihbopui a phallo a ni ngei ang.

Chutiang chiah chuan lirthei neitu pawhin, a lirthei tipalhtu post siam a lo hmuhin, ngaihdam duhna lian tak a nei nghal a, a ngaidam mai ni loin, a tan thil ṭha tih sak a duh thu comment a lo pe chhunzawm ve nghal a ni.

Zonunmawi kan tih hi hnam zia lanchhuahna a nih theih laiin, chu Zonunmawi chawinungtute chu Zofa mimal tin te kan ni thung a, chumi infawkkhawm chu Zofate min phuarkhawmtu Zonunmawi kan tih hi a lo ni...!!