Aizawl: Mizoram sawrkar chuan Zofate insuihkhawm lehna atan kawng hrang hrangin hma a la mek tih Chief Minister Zoramthanga chuan a sawi.

GAD changtu Minister Zoramthanga hian Aizawl North I bialtu MLA Vanlalhlana zawhna ziaka a chhanna ah Tripura leh Manipur lama Zofate nen intlawhpawh a awlsam zawkna atan Tripura lamah Aizawl-Behliangchhip /Phuldungsei atan leh Manipur lamah Aizawl-Churachandpur/Lamka ah te, Myanmar lama Zofate nen intlawhpawh a awlsam zawkna atan Aizawl-Tahan inkarah bus service tir tuma hmalak mek a ni tih a sawi a.

Hei bakah hian Mizoram pawna Zofa awm-khawm tamna hmun 10 thlang chhuakin 'Zo kutpui' hman nan nuai 100 dah a ni a. Amaherawhchu Covid 19 vangin heng ruahmanna te hi Vanghmun (Tripura) leh Churanchandpur (Manipur) ah chiah hman a la ni hrih niin a sawi.

Zofate insuihkhawmna atan hian kumtin Chapchar Kut hman thin a ni tih Chief Minister hian a sawi a. Kut hi Aizawl district bikah chuan Zofa hmun hrang hranga awm te kan inpumkhat theihna turin an kal man te tum sakin chah thin an ni tih a sawi a.

Art & Culture department leh MZP te tangkawpin kum khat dan zelah Zofate insuihkhawm zel nan hmun hrang hranga mite sawmin 'Zofest' hman thin a ni tih a sawi bawk a. hei bakah hian kum tinin hmun 5 velah Mizo culture vawn nun zel nan leh Zofate inpumkhat nan YMA te nen 'Cultural Meet' hman ho a ni thin a. hei bakah hian ramri hnaiah a khawsa te tan border area cultural meet kumtin ramri ah hman thin a ni tih a sawi bawk.