Ni 19 thawhlehni, 2022 atanga khelh tan tur, D3 Amrit Cement 22nd Inter Branch YMA Volleyball Tournament chu zirtawpni zan khan CYMA Hall, Tuikhuahtlang-ah khuhhawnna hun hman a ni a, Lalhmachhuana, Vice President CYMA chuan Spike Off na hun a hmang. 

He tournament hi R Dengthuama Indoor Stadium-a khelh tur a ni dawn a, hall chhungah hian court pathum rin niin hmun thumah a rualin team parukin an khel thei dawn a ni. Vollyball tournament hi an khelh chhung zawngin LPS Cable te chuan Live-in an pe chhuak thin dawn a ni.

Inter Branch Volleyball tournament hi kum hnih chhung zet neih a ni tawh lo va, tum tum tournament hian hlut a hlawh hle a, mipa team bik hi YMA Branch 104 atangin an inlan dawn a, hmeichhe team 39 zetan tel dawn bawk. Thawhtanni hian court 3-ah match 18 a awm dawn a, pool A atangin Hlimen leh Vaivakawn ten an khel hmasa ber ang. 

Covid-19 vangin hun rei tak chhung infiamna a chawlh hnuah Mizoram pum huap inelna lian tham buaitsaih a ni chho leh tan a, infiammi leh mipui lam pawhin an hlut chho hle niin a lang.  

Spike Off hunah hian Dr Lalmalsawma Nghaka, Mizoram Volleyball Association President leh Sponsor tu nibawk chuan thusawiin, “Thalai Volleyball a tuimi te leh tuihal mek te dinhmun hrethiama CYMA hruaitu leh MVA ten tournament an buatsaih tur hi a lawmawm a, zirna sang rap lem lo tan pawh kawng tam takah hlawhtlinna a inhawng a, theihtawp chhuah a, beidawng mai lo va, hlawhtlin tum tlata bei tute chu an hlawhtling thin a ni,” a ti. 

Sawi zawmin,”Thalai ten ngaihsan tur dik kan hriatthiam a hun tawh a, retheihna leh harsatna inbawhbeh tir mai lo va, beiseina nen ke kan pen hram hram a pawimawh a ni. Hausa te pawhin kan hausakna te midang tana malsawmna engkawngah emaw tal an lanchhuahtir a tha a ni,” a ti. 

Lalhmachhuana, Vice President CYMA chuan,“Inter Branch Volleyball tournament lo awm tur hi player leh coach ten dikna nen YMA taka tournament khel turin ka ngen duh che u a, chak duhna avanga dik lo taka hmala lo turin team enkawltute ka chah duh bawk che u a ni,” a ti. 

Roneihthanga, Finance Secretary CYMA chuan fixture tlangzarna a nei a, Lalrosanga, Vice Chairman CYMA, Sport Sub Committee chuan lawmthu sawina hun hmangin CYMA leh MVA te inpekna vanga Volleyball inelna buatsaih a ni thei leh  YMA Branch hrang hrang hruaitute leh player te inpekna lawmawm a sawi a ni.