Aizawl January 16, 2023 : ZPM chhung inkhawma thusawitu Working President K. Sapdanga chuan inthlan an hmachhawn tum khatnaa khan  thin fel lo tam tak a awm a ti a, nasa leh zualin an inbuatsaih thu leh inthlan kan hmachhawn tur chu thartchhiat inzirtir pawl leh taimak inzirtir pawl te indona a ni dawn niin a sawi.

ZPM Working President chuan, “Politics inthial mekah hian party lian pahnih te an kal ngaiin an kal ang a, keini ZPM party hi kalphung tharin kan kal thung dawn a ni. Vawiinah hian sum tam tak seng chung pawhin kum khat daih kawng tak ngial pawh kan siam hlei thei lo a, a pawi hle. Kan hma lawka inthlan lo awm tur hi corruption hi la hluar zel rawh se ti leh corruption hi um tawm ni rawh se ti pawl, kan ram hi chhe zel mah se, a pawi lem lo ti leh kan ram hi lo tha ve tawh rawh se ti pawl, thatchhiat inzirtir zel pawl leh taihmak inzirtir pawl indona a ni dawn a ni,” a ti bawk.

K Sapdanga chuan, “Kalphung thar mipui sawrkar din hi kan thupui ber a ni a, ZPM anga inthlanpui vawi hnihna hmachhawn turin kan party pawh kan inbuatsaih mek a, a tum khatnaah kha chuan pawl ding thar kan nih avangin thil fel tawk lo tam tak a awm a, party pawhin hmasawn zelin kalphung thar mipui sawrkar din turin vawiinah hian nasa lehzualin kan inbuatsaih mek a ni,” a ti.

Vawiin ZPM chhung inkhawm hi Secretary General PC Vanlalruata chuan a kaihhruai a, Rev. C Sangliana, PCI chuan hunserh a hmang a. Rev. Dr. K Thanzauva’n chuan malsawmnain a tin a ni.