Aizawl May 18, 2024 : April 19, 2024-a Mizoram Lok Sabha MP inthlana vote tlak thatna ber polling station chu Keifangtlang niin 106.41% a ni.

Vote tlak thatna ber, Keifangtlang hi Champhai district-a awm niin voter awm zat hi 78 a ni a, helai hmuna awmten vote an thlak that bakah Form 12 A for EDC (Election Duty Certificate) hmanga vote thlak mi 29 an awm bawk avangin Mizoram chhunga polling station zinga vote thlak thatna ber a ni thei niin BLA Lalhmingliana chuan ZALEN a hrilh.

Mizorama polling station zinga vote tlak thatna ber pahnihna chu New Hruaikawn Polling Station niin 100% a tla a, BLO chu Lalzawnzela a ni a. Zalen zawhna chhangin, “New Hruaikawnah hian voter 122 an awm a, heng zinga 62 hi mipa niin hmeichhia 60 an awm bawk a. Kan khua atang hian hmun danga awm an awm tam loh bakah vote thlak tum lem lote pawh an inah kalchilhin vote thlak turin ka hruai a, hei vang hian vote tla hi a that phah a ni,” a ti.

MP inthlan neih zawh taka vote tlak thatna 10 zinga pakhatna leh pahnihna hi Champhai district niin Lawngtlai district-ah paruk leh Lunglei district-ah pahnih an awm a ni.