Australia chuan Inrinni atang khan South Africa, Namibia, Zimbabwe, Botswana, Lesotho, Eswatini, Seychelles, Malawi leh Mozambique atanga an rama luh chu ni 14 chhung an khap tih an puang a. Australian ni lote chu heng ram atanga an rama luh an khap vek tihna a ni.

Japan chuan Africa chhim lam ram atanga an rama luh hi khap chiah lo mah se an ram an thlenah ni 10 inkhung hrang turin an ti a. Hetih chhung hian vawi li inendik turin an ti bawk.

India pawhin South Africa, Botswana leh Hong Kong atanga an rama lutte chu uluk leh zuala lo endik (screening) leh test kalpui turin an ti.

Iran chuan Africa chhim lam ram paruk, South Africa pawh telin, an rama luh a phalsak lo va. An ram TV chuan Iranian-te ngei pawh heng ram atanga lut tur chuan vawi hnih endikah hri an kai lo tih fiahna nei turin a phut bawk tih a puang.

Brazil pawhin heng Africa ram paruk atanga an rama luh a khap nghal tawh.

Canada chuan ni 14 kal ta chhunga  South Africa, Namibia, Zimbabwe, Botswana, Lesotho, Eswatini leh Mozambique tlawh chu an rama luh a phalsak lo.

Thailand pawhin Africa chhim lam ram pariat atanga an rama zin luh a khap hmiah bawk.