Aizawl: Village/Local Level Task Force-ten quarantine tawh result negative-te an inkhung hran chhunzawmtir thin laiin, Mizoram Legislative Assembly member atanga Lalduhoma bân a nih thu an puan ni, Zirtawpni khan Treasury Square-a police duty eng emaw zat zingah Covid-19 result chhuak hlim, isolation ti hman lo mi eng emaw zat chu duty-tir niin ZALEN chuan thu a dawng.

ZALEN thu dawn pakhat heng duty-te hi an result negative vek tih a sawi a, chutihrualin anni hi hri kai chu an ni lo thung a, negative result an hriat hnua la inkhung hrang lo an ni. Heng duty-te hi 5th IR Battalion mi leh sa Lungverha mite an nih thu thudawnna chuan a sawi a, an duty-na hmun nen lam ZALEN an hrilh.

Hemi chung-changah hian an duty hnai vela 5th IR duty-te chu chutiang an awm leh awm loh zawh an ni a, an awm loh thu an sawi, chutihrualin an battalion mi thovin heng result chhuak hlimte hi duty tir ngei an nih thu ZALEN a hrilh a, anmahni lam pawh an lungawi vak lo tih a sawi lang a, duty-tirte hi sipai 16 an nih thu a sawi bawk.

ZALEN-in veng hrang hrang Local Level Task Force a biakpawhte chuan an veng chhung mi quarantine-te chu an result negative mah se, home quarantine emaw, isolation emawa ni sarih chhung an inkhung hrantir ziah thu an sawi hlawm a, tun hnaia containment zone atanga fihlim ta, Dinthar Veng Local Level Task Force secretary C. Vanlalhruaia chuan an veng mi reng reng chu an result a negative hnuah pawh ni sarih chhung an inkhung hrantir thin thu a sawi bawk.

Mizoram sawrkar, Health & Family Welfare Department in notification a siam, No. D.33011/25/2020-HFW[in Cov/Sat(D) October 31, 2020 a tihchhuah ang chuan secondary contact te hi an result a chhuah a, an negative a nih chuan khung hran an ngai lovang tih a ni thung.