ZALEN March 3, 2025 : Mission Foundation Movement (MFM) chuan vawiin khan Sihphir, Lungdai leh Durtlang-a Mizoram Iskut Grower Association te hnenah Iskut enkawlna atana hman tur Leitha semna hun an hmang a, hmanpuitu Agriculture Minister PC Vanlalruata chuan Iskut chingtute tan theihtawp an chhuah tur thu leh Sawhthing fai leh tha hmuh an inbeisei thu a sawi.

He hunah hian Iskut chingtu chhungkaw 60 hnenah Leitha sem a ni a, he project hi Ministry of Tribal Affairs hnuaia Support to Tribal Research Institute fund niin Social welfare & Tribal Affairs Department kaltlanga thawh a ni.

Tun hnai kum engemawzat atang khan Sihphir leh a chhehvela Iskut thar chhuah a tlem sawt a, he Research Project hnuaiah hian Iskut chingtute dinhmun leh an hmalak mekna bakah harsatna an tawhte zirchianna neih mek a ni bawk.

Khuallian PC Vanlalruata chuan, "Sihphir, Lungdai leh Durtlang te hian Iskut tam tak thar chhuakin chhungkaw tam tak ezawnna a lo ni tawh thin a, Mizoram bakah ram pawn thleng pawha thawn chhuah thin a ni. Kum 10 vel kal ta atang khan Iskut thar chhuah a tlem tial tial a, tun dinhmunah phei chuan tih tham thar chhuah a awm ta meuh lo. Isktut thar chhuah a tlemna chhan hrang hrang zirchiang tura ke pen an awm hi a lawmawm tak zet a, Iskut chingtute tan beiseina thar a pek ngei ka beisei a ni," a ti.

Agriculture Minister chuan, "Iskut pawh kan thar chho zel a nih chuan market fel leh system felfai taka luhpui che u kan tum dawn a, kan farmer tan tharchhuaktu nih bakah a hralhna (Market) buaipuitu nih inkawl hi a hnahnihin in tan a hautak a, farmer ten in thar chhuah sa pawh a hralhna nangmahni bawkin buaipui a ngai a, Sawrkar-in a buaipui ngai lo che u a ni. Kei ni chuan kan thlai tharte lilamna tur platform siam kan tum a, market platform kan siam hunah chuan tunhmaa inharsatna thin hi sutkian a nih thuai kan beisei."

"Tunah hian Sawhthing hi vairam lamah chuan Kg ah ₹ 25 te, ₹ 30 te a ni a, Sawrkarin kuthnathawktute a lo tiam tawh avangin support price hmangin Kg ah ₹50 in kan laksak mek a ni. Hetih rual hian a vawikhatna a nih a vangin tlema lo buarchuar deuh a lo awm maithei e, kan farmer te pawh an lo la inpeih lo deuh a niang, Sawhthing bal leh ningnel deuh te a la awm a ni. Vairam lama thawnchhuah zahpuiawmloh Sawhthing fai leh tha tak kuthnathawktute atangin hmuh kan inbeisei a ni", a ti