DOWNLOAD OUR APP

Read latest news on your phone
app-store
ISRAEL-HAMAS INDO: Hamas helin an mi an hren leh hmun an laksak lak let tumin Israel-in bei
Oct 08, 2023

Israeli venhim hna thawktute chuan Inrinnia Gaza atanga Palestinian helhovin an rama luta an ram mite an hruaite chhanchhuah tum leh hmun an lakte chhuhsak tumin beihpui an thlak mek zel.

Sipaite hian Israel chhim lam hmun 22 chu himah an chhuah tawh thu leh hmun riat dangah beihpui an thlak mek tih Pathianni khan an sawi.

Hamas-ho hian rocket-a nasa taka an kah laiin an luhchilh thut a, Israel-ah hian mi 300 vel zet an thi nia sawi a ni.

Israeli-ten an chhan letnaah Gaza-ah mi 310 chuang an thi ve bawk.

Lehlam lehlamah hian sang chuang ve vein hliam an tuar.

Israeli Prime Minister Benjamin Netanyahu chuan Inrinni zan khan Israeli-te chu ‘indona rei leh hautakah’ an awm mek tih a sawi a. Gaza-a roreltu, Hamas-te chu vauin an tawmna zawng zawng chu ‘hnawmhnawkah’ chantir a ni dawn tih a sawi bawk.

Hamas hruaitu, Ismail Haniyeh erawh chuan ‘hnehna ropui chang turin an thleng tep’ niin a sawi ve bawk.

Kum 50 liam taa Yom Kippur War hnua Israel-a tharum thawhna a thlen nasat ber ni, Inrinni tuk vartianah khan Gaza helho hian an bei thut a, he ni hi Jewish Sabbath a nih bakah Simchat Torah kût ni a ni.

Silai nena thawk chhuakte hian an ram daidanna chu paltlangin Israel chhim lamah hian motorbike leh paraglider bakah tuipui atangin an lut.

Israel Defense Forces (IDF) thupuangtu chuan helhi hi za tel takmeuh an nih thu an sawi a, ramri an kân mek lai hian rocket 3,000 chuang zet Israel-a khawpui leh thingtlang lamah kah a ni a, nilengin an kap niin an sawi.

“Israeli chenna veng leh IDF hmunte an bei a, kawngka tin leh in tin an dap a ni,” tiin Lt Col Jonathan Conricus chuan Inrinni zan khan X-ah a tar lang.

“Rawng takin an inah Israeli civil mite an that a, Gaza-ah kan mite leh sipaite an hruai lui a ni,” a ti bawk.

Israel-a health ministry chuan mi engzat chiah nge thah an nih a sawi lo va; mahse, Israeli chanchinbute chuan 300 an sawi tling a, mi 1,860 chuangin hliam an tuar bawk niin an tar lang.

Inrinni zan zankhua khan Israeli venhim hna thawktute chuan helhovin an hrente an chhanchhuak a, veng pakhatah chuan chaw eina pindan zim takah mi 50 dawn an lo khungkhawm nghe nghe.

Sderot khuaa police station thununtu hel 10-te chu Pathianni khan thah kim an ni bawk.

Pathianni tukah khan IDF chuan hmun riatah ‘inbeihna a la awm’ niin thuthar lakhawmtute hnenah an sawi a. Heng hmunah hian venhim hna thawktute chu in tina lutin ‘firfiakte an la awm em?’ tih an endik mek niin an sawi.

Sderot leh Kfar Aza kibbutz-ah chuan sipaiten mi hrente chhanchhuah tumin a hrengtute nen an la inbei mek niin IDF chuan a sawi bawk.

Israel-a inbeihnaah hian ralthuam keng mi 400 chuang thah niin tam tak man an ni bawk niin IDF chuan a sawi.

Gaza hnaiha chengte zawng zawng chu darkar 24 chhunga hmun him zawka thiar chhuah vek turin an ti bawk.

Lt Col Conricus chuan tunah rih chuan Israeli sipai leh hmeichhia leh naupang civil mi engzat chiah nge Gaza-ah hruai an nih tih chu hriat tum a nih thu a sawi.

An chhungte chin hre lote chu police station-ah an thilte kenga DNA sample an lak theih nana thlen turin an ngen.

Mi pakhat, Moshe Or chuan Inrinni khan a unaupa, Avinatan leh a bialnu, Noa Argamani te chu helhovin Gaza-ah an hruai ngei tih social media-a video an tar lanah a hmu tih a sawi.

“Video-ah khan Noa chu a hlauvin a mangang hle tih a lang,” a ti.

Netanyahu chuan Hamas-ho chu vauin Israeli an hrente chu tha taka enkawl tur leh ‘an lua an sam zai pakhat pawh khawih lo turin’ a ti.

IDF chuan ‘a rang thei ang berin Hamas-ho inbunna zawng zawng’ tichhe turin a ti a. Gazan-te chu an in chhuahsana hmun him pan turin a ngen bawk.

IDF hian Pathianni tukah khan Hamas-te thil 426 zet an kah thu an sawi a, heng zingah hian an pawla intelligence department hotupa ber chenna pawh a tel tih a sawi.

Gaza City-a Watan Tower pawh an kap a, he hmun hi heng laia internet service provider-te hmunpui niin Inrinni zana an beihnaah an kap chhia tih an sawi.

Palestinian health ministry thuneitute chuan mi 313 an thih thu an sawi a, heng zingah hian naupang 20 an tel tih sawiin mi 1,990-in hliam an tuar bawk.

Gaza City-ah hian Inrinni tuk leh Pathianniah chuan boruak a inang lo hle a. Inrinni tukah khan Palestinian-te chuan kawtthlerah lawm taka an khawsak laiin Pathianniah erawh kawngka an khar a, hmun hrang hrangah thil puak leh meikhu a tam hle.

Israel-a security cabinet chuan Gaza-in electricity leh tuialhthei a lak luhna an titawp a, bungrua an lak luhna an khar bawk.

Pathianniah vek khan IDF chuan an laipuiten Lebanon chhim lam kapin drone hmangin ‘mi firfiakte hmun’ an kap niin an sawi a. Heng hmunte hi ram inchuh lai, Shebaa Farms/Mount Dov-a Hezbollah helho beihna an chhan letna a ni a, thi leh hliam erawh an awm hriat a ni lo.

Hezbollah chuan Israel leh US ten ram bil buainaah mi dang inrawlh lo turin au nasa hle mah se rocket leh laipuiin Israeli tanhmun pathum chu ‘Palestinian thlawpna’ lantir nan an kap tih a sawi.


PATHIANNIA THIL THLENG

INDONA

  • Gaza Strips-a cheng Palestinian maktaduai 2.3 chuangte chu Inrinni zan khan inbeihna nasa tak karah tlaivarin Israel hian thlawhna hmangin nasa takin a kap a, power an lak luhna a tihtawpsak bawk.
  • Israeli-te hian liantham tak taka thil tipuakin chenna in tam tak an tichhia a, heng zingah hian chhawng 14-a sang tower, apartment tam tak awmna bakah Gaza City lailia Hamas pisate pawh a tel bawk.
  • Israeli sipaite hian Gaza Strip-a Hamas-ho intelligence chief in an luhchilh niin an sawi a. Netanyahu-a’n Hamsas lakah hian ‘phuba lakna’ an neih ngei tur thu a sawi.
  • Hezbollah helhovin ram buai lai, Shebaa Farms-a Israel sipaite tanhmun pathum a kah hnuah a chhan let nan Israel hian laipuiin Lebanon chhim lam a kap chiam bawk.
  • Israeli sipaite hian chhim lama Sderot khuaa police station an thunun leh tawh a, tual chhungc hanchinbute chuan helho nen darkar khat chuang inkapin Palestinian fighter 10 vel an thi niin an sawi.
  • Hamas hnuaia an indo pawl, Qassam Brigades fighter tam tak chu Israel-a khawpui eng emaw zatah la awmin inkahna a la thleng reng.


PALAI HNA

  • United Nations Security Council (UNSC) chuan tharum thawhna nasa tak thleng mek chungchang sawiho tur hian Pathianni tlaiah thutkhawm a ko.
  • Thutkhawm hi tuna UNSC member ni mek, Malta chuan neih a tul thu a sawi hmasa ber a, United Arab Emirates (UAE) leh Brazil ramten an thlawp zui a ni.
  • China chuan kartawpa tharum thawhna nasa tak a thleng chu ‘pawi a tiin a ngaihven reng’ tih a sawi a. Israel leh Palestinian-te chu ‘boruak tidai turin’ a ngen nghal bawk.
  • Egypt chuan Saudi Arabia leh Jordan biain Palestinian-Israeli boruak tidai tura chet lakpuiah a saw, tih Egyptian Ministry of Foreign Affairs chuan a sawi.
  • Jordanian Foreign Minister Ayman Safadi chuan boruak chu ‘rang taka tihdaih’ a ngai tih a sawi a, “A bik takin West Bank-a khawpui leh mi chengten Israeli-te beihna an tawh leh Palestinian mipuite dikna palzut a ni chu tihtawp nghal a ngai,” tiin a sawi.
  • Saudi Arabia pawhin ‘rang taka tharum thawhna tihtawp’ a tul tih a sawi a. Hetih lai hian US President Joe Biden chuan Inrinnia Hamas-ten Israel an bei thut chu ‘awm ang lo’ a tih thu leh a sorkar chuan ‘amah a invenna tur atan’ Israel chu a pui thei reng tih a sawi.


THI LEH HLIAM

  • Israel-in a chhan letna avang hian Gaza Strip-ah chuan Palestinian 256 an thi niin damdawi in thuneitute chuan an sawi a, mi 1,800 chuangin hliam an tuar bawk.
  • Gaza Strip-a thi zingah hian naupang 20 an tel niin health minister chuan a sawi a, naupang 120 velin hliam an tuar bawk.
  • Israel chuan Hamas-ten an ram chhim lam an beih thutnaah hian an sipai 26 vel an thi niin an sawi a. A vaiin Israeli 500 vel an thi tawh niin tual chhung chanchinbute chuan an sawi.
MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh