DOWNLOAD OUR APP

Read latest news on your phone
app-store
ISRAEL-HAMAS INDO: Ni hnih dang inkahhai an pawt sei
Nov 28, 2023

Israel leh Hamas te chuan Gaza-a an indo meknaah ni li inkahhai an puan chu ni hnih dang an pawt sei niin palai hna thawktu, Qatar chuan a sawi.


Hamas chuan he pawh sei hi ‘a kalphung ngai’ tiin an sawi a, Israeli an hren 50 an chhuah ang a, lehlamin Palestinian lung in tang 150 an chhuah ve thung dawn niin an sawi.


Israel erawh chuan inkahhai pawh sei chungchangah eng thu mah sawi an la nei lo va; mahse, a hmain Israeli 10 chhuah zelah ni khat zel indo chawlh erawh an sawihmuh tawh.


Zirtawpni khan inremna hmasa hi kalpui tan niin Thawhtannia a tawp niah a hnuhnung ber atan an mi tang inthleng tawn tura ruahmanna an kalpui mek laiin pawh sei hi puan a ni.


Thawhtanniah khan Israeli hmeichhia leh naupang 11 chu Gaza atanga chhuah an ni a, Israel-in an lung in atangin Palestinian hmeichhia leh tleirawl 33 a chhuah ve bawk.


Israel, UK leh khawthlang ram lianten firfiak pawla an chhal, Hamas hian inremna tawp hma ni thum chhung khan Israeli 33 an lo chhuah tawh a, Israel hian a thleng nan Palestinian mi tang 117 an lo chhuah ve tawh bawk.


Inremna hran hmangin ram dang mi 19 chu Hamas hian an chhuah tel bawk a, an zinga pakhat hi Israeli khua leh tui nihna nei tel a ni nghe nghe.


Ni li chhung inkahhai puan lai hian nunau dinhmun chhe takte puihna tur tam zawk Gaza-a thawn lut tura inremna siam tel a bawk.


October 7-a Hamas silai kengten ramri kâna Israel beia mi 1,200 vel an thah bakah mi 240 chuang an hren hnuah Israel hian Gaza hi a rûn a ni.


Gaza-a Hamas enkawl sorkar chuan Israel-in a beihnaah hian mi 14,800 chuang an thi tawh niin a sawi.


Qatari foreign ministry thupuangtu, Majed al-Ansari chuan Thawhtanni chawhnuah khan ‘palai hna thawh a nih angin Gaza Strip-a mihringte tawrhna chawlhsan rih turin ni hnih chhung inremna pawh sei a ni’ tiin X-ah a tar lang.


White House national security thupuangtu, John Kirby chuan inkaihhai hun pawh sei avang hian US a lawm hle tih thuthar lakhawmtute a hrilh.


“He indona chawlhsan hian indona tuartu mihringte puihna pek a titam thei dawn a. Tunah chuan inkahhai pawh sei a nih angin Hamas hian ni hnih chhung hian an mi hren hmeichhia leh naupang 20 dang an chhuah leh dawn a ni,” a ti.


“Hamas-in an mi hrente an chhuah dan azirin pawh sei zui zel pawh kan beisei,” a ti bawk.


Thawhtannia Hamas-in an mi hren an chhuah hma khan Israeli thuneitu sang pakhat chuan Gaza-ah mi 184 hren an la nih thu a sawi a, heng zingah hian ram dang mi 14 leh ram dang leh Israeli khua leh tui nihna nei kawp 80 an tel thu a sawi.


Pathianni khan Palestinian thuneitu sang pakhat chuan Hamas hian Israel-in inkahhai ni lia pawh sei a rawtnaah an mi hren 40 dang chhuah leh an inpeih tih a lo sawi tawh bawk.


Israel hian ni khat tete-a pawh seia a tawpa Hamas-in mi a hrente an chhuah kim hunah Gaza-ah beihpui thlak thar leh a tum mek bawk.


Pathianni tlaia video-a thuchah a sawiah Prime Minister Benjamin Netanyahu chuan, “Kan intihfel hunah thapuia chet kan tum a, kan tum chu Hamas chhut chimiha Gaza hi tuna a dinhmun anga kirtir tawh loh a ni a. Eng pawh ni se, mi hrnte chhuah vek hi kan thupui a ni phawt,” a ti.

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh