February 3, 2023; Mizoram ah damchhung a Jail tang tur (lifer) mi 48 an awm mek a, chung zinga 1 chu hmeichhia a ni. February ni 1, 2023 thleng khan Mizoram a Jail hrang hrang 10 ah mitang (prisoners) 1,709 an awm a, awm thei zat (Jail Capacity) aia mitang an tamna chu 323 a tling.

Prison department tarlan danin, damchhung tang tur mipa 47 te chu Central Jail, Aizawl ah an awm a, Women Jail ah hmeichhe 1 a awm bawk. Hetihlai hian Mizoram ah Jail 10 awmin, chung chu mi 1,386 awm theihna a nih laiin, tang awm mek zat chu 1,709 an tling.

Jail lian ber Central Jail, Aizawl chu mitang 438 awm theihna a nih laiin, February ni 1, 2023 thlenga tang awm zat chu mi 800 an tling a, tang awm thei zat an pelhna chu 362 a ni. District Jail Siaha, Kolasib, Lawngtlai leh Mamit tih loh District Jail dang zawngah tang awm thei zat aia tam an awm vek.