ZALEN June 18, 2025 : Ruihhlo kaihhnawih vanga man Central Jail atanga tlanchhuak Lalthawmthanga'n tlanbona atana a hman Bike chu nimin khan Pawlrang daiah hmuh a ni, amah erawh man ala nilo. 

Thulakna in a tarlan danin, nimin khan Pawlrang dai kilometre 3 vela hlaah Lalthawmthanga'n tlanbona atana a hman Bike hi hmuh a ni a, Ngopa Police hriattir nghal niin, Ngopa Police Station-ah BIke hi an la nghal a ni. 

Bike hi Central Jail atanga tlanchhuak Lalthawmthanga nau ta a ni a, Lalthawmthanga hian Lengpuia an huan atangin Bike chabi hi a nute a chhuhsak ni-a thudawn a ni. Lalthawmthanga tlanbona Bike hi hmuh ni mah se, amah erawh man a ni lova, ngawrh taka zawn zui zel a ni. 

Tarlan tawh angin Lalthawmthanga (28) Aizawl zonuam veng hi Pathianni zan dar 10 leh 11 inkar khan a tanna cell kalhna tala chhuchhia-in a tlan chhuak a. A tanna cell atanga a chhuah hnu hian a awmna building tukverh steel bar chu kar kau-in a chhuak leh a. Puan suih zawm hmangin Duty post hmuh phak lohah pawnah a uai thla a ni.