Aizawl : National AIDS Control Organisation (NACO) leh All India Institude of Medical Science, Ministry of Health & Family Welfare, Government of India ten India ram state hrang hranga Jail tangte a zirchianna leh chhanna an dawn atangin Central Jail, Mizoram a tang zingah za-ah-20.8 zetin HIV/Aids an vei tih hmuhchhuah a ni.

Mizoram hi India ram huap ang pawhin Acquired Immune Deficiency Syndrome (AIDS) vei hi an tam fal hle. India ram jail tang atanga chawhrualin tang zinga he natna vei hi 2.1% a nih laiin Mizorama tang te zinga AIDS vei hi 20.8% an tling. Mizoram hnuai chiahah hian Punjab chu awmin tang zinga 6.7% in AIDS hi an vei a, North East state zingah Mizoram dawta sang ber chu Nagaland niin 4.7% an ni a, Assam chu 4.4% niin Manipur 3.0% an ni. Jail tang te blood sample hi Aizawl-a test a nih loh thu leh a test-na hmun bika ruata state dang te nen test a ni thu kan thu dawnna chuan a sawi.

Central Jail, Aizawl bik zirchiangtu atanga ZALEN in thu a dawnna chuan, tang zingah hian drugs khawih an tam hle a, 40% aia tam mah hi damdawi lama thil lo khawih tawh an nih thu a sawi, 90% zet hi sex hmang tawh an nih thu a sawi bawk. Heng tang zingah hian Condom hmang thin hi 4% vel chiah an nih thu a sawi a, HIV/AIDS inkaidarhna chance a san pha hle tih a sawi bawk.

NACO leh a tanrualpui ten Jail tang mipa te chhan tur zawhna engemaw zat an zawt a, zawhna pawh hi a chipchiar hle a, sex an hman tawh leh tawh loh te, an hman hnuhnun ber te, an tan puite sex an hmanpui em tih te, drugs an khawih ngai em? tih te, ziak leh chhiar thiam an ni em? tih te, an zir san zawng thlengin an zawt. HIV/AIDS an hriat dan te mai bakah sex hmanlaiin condom an hmang ngai leh ngai loh te leh zawhna dang tam tak zawh tel an ni a, chumai bakah heng zawhna an zawh te thisen hi test sak vek an ni bawk.

Heng zawhna te chhanna atanga a lan dan hian jail tang zingah drugs ti an tam hle a, sex lamah hian an mikhual lo tlang hle bawk. Sex hmang zingah condom hmang thin an tam lo a, Jail tan pui te sex hmanpui thin engemaw zat an awm a, Mizoram bikah pawh hetiang ching hi an awm a, tang zinga 6% an tling.