India leh Pakistan inrina, Jammu & Kashmir-a Nowshera-Sunderbani sector, Line of Control hrula Inrinnia chilpuah bomb puakah sipai pahnih an thi a, pathumin hliam an tuar bawk.

Thuneitute chuan thite hi officer leh sipai pangngai an nih thu leh LoC hrula an patrol-naah an chilpuah palh avangin an thi tih an sawi.

Hliam tuar sipaite hi sipai damdawi inah lak nghal an ni a, pahnihte hi an dinhmun a tha lo hle bawk.

“Thi pahnih an awm a, pathum dangin hliam an tuar a ni,” tiin police officer pakhat chuan a sawi.

News agency PTI-in thuneitute sawi a tar lanah heng lai hmunah hian sipaite vek hian ramri kâna a ruka India luh tumte dan nan chilpuah bomb an kam teuh thin.

Nowshera sector an tih hi Rajouri district chhunga mi niin Jammu-a Pirpanjal region-a mi a ni a. Sipaite hian chawlhkar thum liam ta atang khan beihpui an thlakna hmun a ni.

Poonch ramngawa chawlhkar thum beihpui an thlak tawh chhung hian sipaite hi pakua lai an thi tawh a, an zinga pahnih chu officer an ni nghe nghe a, mi firfiak erawh kah hlum an la nei lo thung.

Tun tuma beihpui an thlak hi kum 18 liam ta chhunga sipaiten mi firfiakte beiha an thawh chhuah rei ber tum a la ni nghe nghe.