DOWNLOAD OUR APP

Read latest news on your phone
app-store
Japan-a thlawhna insu a kang nasa
Jan 02, 2024

Tokyo-a Haneda airport tumkawngah Japan Airlines thlawhna leh coastguard thlawhna tê chi insuin nasa takin a kang.


Passenger 379 leh thawktute chu lak chhuak theih vek an ni a; mahse, coast guard thlawhnaa chuang mi pangate chu an chin hriat a la ni mai lo va, captain erawh a him thung.


Video thehdarhah chuan thlawhna hi a kang nasa hle a, tumkawng pawh a kang tel bawk.


Hokkaido thliarkara Sapporo atanga tum thlawhna kang hi kangthelhtuten thelh tumin an bei nasa hle.


Japan Airlines Flight 516 hi Sapporo-a New Chitose airport atangin tlai dar 4:00 (India-a chhun dar 12:30)-ah chhuakin Haneda-ah hian tlai dar 5:40-ah a tum.


“Eng ang chiaha chhiatna nasa nge a nih tih kan la bawhzui mek,” tiin airline chuan a sawi niin NHK chuan a puang a. Coastguard crew panga an thi niin a sawi a, finfiah erawh a la ni rih lo.


An insut theih dan pawh hi engmah hriat a la ni lo va. Coastguard chuan engtianga insu nge an nih leh thlawhna khawi laiah tak nge an insut tih an chhui zui mek tih an sawi.


Coastguard thlawhna hi Niigata airport atanga Haneda pan niin Thawhtannia Ishikawa-a lirnghing thlenga chhanchhuah leh chhawmdawl hna thawk tur an ni a. Lir a nghinna hmuna tirh thlawhna pali zinga mi a ni.


TV-a a lan dan chuan kangthelh motor tam tak hmuh tur awmin thlawhna atang hian mei nasa tak alh leh nasa taka khu pawh hmuh theih a ni.


Hmeichhe pakhatin mi tam takin thil thlenna hmun an thlir lai thlalak a dah chhuak bawk.


“Ka chuang ve a, ka him e. Ka lawm tak zet,” tiin X-ah a tar lang.


Haneda airport hi a tumkawng zawng zawng khar rih nghal a ni tih an thupuangtu chuan a sawi niin Reuters chuan a tar lang.

India leh Myanmar Border Fencing
India leh Myanmar ramri hung tum chungchang hi eng nge i ngaihdan?
Hung hi tha ka ti lo
Hung se ka ti
Ngaihdan ka nei lo

Latest News & Chhiar Hlawh